Monday, April 23, 2007

مش لاقية كلام



مش لاقيه كلام أقوله

حاسة بإحساس فظيع



حزن عميق دفين مش راضي يتزحزح


كنت بتفرج على فيلم البوابة المصرية

اللي عامله أحمد شلبي




وضاع مني الكلام بعدها



هو عبر عن كل حاجة حصلت لنا



( وبينما تفتح أبوابها لهم ... تغلق أمام أبنائها )


دي حقيقة




شمعة الأمل جوايا بتطفي دلوقتي






مش قادرة خلاص




مش قادرة أشوف مصر اللي حبيتها


بيحصل فيها ده


مش قادرة أشوف الظلم وأفضل ساكتة


مش قادرة أتخيل مدى السلبية اللي بقت عندنا



مش عايزة أصدق أن شعب مصر بقى كده



هو حقيقي كلام سيدنا عمرو بن العاص عنه ؟؟


أنه بيتبع حكامه و لاينتفض ؟؟




لو متكلمناش النهاردة ودافعنا عن حقوقنا .. امتى هندافع !!؟؟



لو كل واحد قال أنا مالي



امتى هنتغير !!؟؟








زهقت من الجملة اللي بتتقال لي كل لما أعمل نشاط سياسي




انتي بنت وخافي على نفسك وراعي أهلك



هو عشان بنت يبقى أسكت عن الظلم !!؟؟؟



هو عشان بنت يبقى أنحني لرياح الجور



وأقولها عدي من فوقي ؟؟


هو عشان بنت لازم أفضل خايفة من المعتقل .. وخايفة على أهلي لما يشوفوني عالتلفزيون بعلن رفضي




وخايفة على خوف أهلي عليا !؟؟



أنا زهقت من كوني بنت محاصرة








أنا بنت حرة


ودي بلدي



دي أرضي ولازم أدافع عنها



لازم أضحي عشانها




مصر هتقوم تاني بتضحياتنا كلنا


مش تضحيات الرجال من غير النساء



أنا بنت ضعيفة صحيح


بس قبل ما أكون بنت أنا واحدة مصرية

يعني حب مصر في دمي من قبل ولادتي


ولازم هنكسر قيد الذل اللي محطوط حوالين حريتنا





يمكن أنا مش قادرة أعمل حاجة كبيرة دلوقتي تكسر الدنيا





بس أنا أقدر أقول للظلم : لا



بأعلى صوتي



لا



لا



لا



أنا هروح بكرة قدام نيابة شبرا


وهقف وأدافع عن حريتنا



هدافع عن معتقلينا



هدافع عن شرفائنا



هدافع عن اللي ورا سجون مبارك ربنا ياخده أخذ عزيز مقتدر



هدافع عن : عبدالمنعم محمود



وكل المعتقلين


هشارك في رابطة :

( مش هتاخد )





وهقول للظلم :



لا


لا























22 comments:

The Manager said...

انتي بنت وخافي على نفسك وراعي أهلك

كلام سليم ربنا ميرضيهوش كدة لأنك مش هتقدرى تعملى حاجة تفيد الأخ عبد المنعم إفادة حقيقية ولا هيطلع بأنك تقولى لأ
قل لو اجتمع الإنس والجن على ان يضروك بشئ لن يضروك إلا بشئ قد كتبه الله عليك
ولكن انتى إللى ممكن تتعبى أهلك لو بعد الشر حصلك حاجة ولا اخدوكى واهلك يقلقوا عليكى ويبقوا هيتجننوا من القلق والتعب

دة شئ ...
الشئ الأخر ان انتى شايفة انه مظلوم ممكن تدعيله ولازم تعرفى انه مش لازم يكون معاه حق فى كل حاجة لأنه برضه مقبوض عليه بتهم معروفة وصريحة زى الإنضمام لجماعة محظورة وطالما الحكومة منعت الإنضمام للإخوان يبقى ليهم حق 100% يحاكموا إللى ينضم ليها لأنها ليست من الدين ومنعها حلال.
وسيبك من دة كله
هو بيدافع عن هويدة طه إللى هى صنعت أفلام ممثلة بممثلين بغرض الإساءة لمصر والأفلام إللى اتمسكت معاها كان فيها الدليل الواضح على التمثيل لأنها كانت بدون مونتاج وصوت المخرج كان واضح وكلاكيت والتصوير البطئ و فيلم بحق وحقيقى يعنى !
وسيبك من دة كمان
دة بيدافع عن كريم عامر إللى اسمه يأتى ملازما للوجو أدعم الدنمارك والملحدون العرب ولا إله إلا الإنسان وسب الإسلام وإزدرائه وحاجات تانية كتير كلنا عارفينها

انا بقول لحضرتك كدة علشان مش تتصورى ان دايما المعارضين على حق
ودايما الحكومة على باطل !!

دة مستحيل وممكن يكون فى حق عند الحكومة أنهم يقبضوا على الأخ عبد المنعم وممكن برضه ميكونش عندهم حق ودة ما يقتضيه العقل وهو صواب عند قول الإمام الشافعى : رأيي صواب يحتمل الخطأ ورأى غيرى خطأ يحتمل الصواب
فربنا أعلم من الجميع من صاحب الحق فى كل قضية نواجهها
فإن كانت الحكومة لها حق وعبد المنعم قد أساء إليها فعلا فهو إذن يدعو لفتنه قد نهى الله عنها صراحة فى كتابه فبعد أن أمرنا سبحانه فى سورة آل عمران بالأمر بالمعروف والنهى عن المنكر أمرنا بألا نفعل كالذين تفرقوا بعدما عرفوا الحق فهؤلاء لهم عذاب عظيم أى ان الأمر بالمعروف والنهى عن المنكر مشروط بشرط هو الا يؤدى ذلك إلا الفتنة والفرقة بين المسلمين
قال تعالى وقوله الحق :
َولْتَكُن مِّنكُمْ أُمَّةٌ يَدْعُونَ إِلَى الْخَيْرِ وَيَأْمُرُونَ بِالْمَعْرُوفِ وَيَنْهَوْنَ عَنِ الْمُنكَرِ وَأُوْلَـئِكَ هُمُ الْمُفْلِحُونَ
َولاَ تَكُونُواْ كَالَّذِينَ تَفَرَّقُواْ وَاخْتَلَفُواْ مِن بَعْدِ مَا جَاءهُمُ الْبَيِّنَاتُ وَأُوْلَـئِكَ لَهُمْ عَذَابٌ عَظِيمٌ [آل عمران : 105]
صدق الله العظيم
كتب التفسير توضح اكثر طبعا

والعلم عند الله
وربنا يبين الحق بإذن الله
والسلام عليكم

خطــاب said...

اخشى ان يأتى اليوم الذى نعلن فيه شعار مفيش فايدة

وضـّاح said...

السلام عليكم

بأيدينا الكثير لنقدمه , وإعتقال واحد أو عشرة أو ألف لا يغير ما بنا فنحن كما كنا بهم

وإذا توقفت الدنيا لحبس أحدهم أو لفراقة لكانت أحق لها أن تقف لفقدها خير البرية عليه الصلاة والسلام

لن نتوقف ولن نستكين

إبدئي بنفسك وإنتصري عليها فهو خير نصر , وحاولي أن تبني مجتمعك فالمجتمعات الناجحة بنيت على أكتاف رجال ونساء

ولا تصدقي من قال أن المرأة ضعيفة
فالمرأة قوية بإرادتها قوية بإلتزامها بدينها

الكلام كثير

أرجو أن أكون أفدتك

المـ(همس)ـشاعر said...

عندى بس رد صغيور على الأخ مانيجر

بجد .. انا باحترم حضرتك جدا .. بس ما تتخيلش كمية القهر و الحزن و الغيظ الى انتابتنى من كلام حطتك ..
ان ما فيش فايدة
و ما تعملوش
و أدعوا

ربنا بيقول " و قل إعملوا فسيرى الله عملكم و رسوله و المؤمنون"

ما قالش و "وقل أدعوا".. اذا النهادره انا ما اتحركتش علشان انسان كل تهمة فى الدنيا انه بيعبر عن رأيه
يبقى بكره انا هابقى مكانه

لو قلت ان ربنا كريم

ممكن ياخدونى .. لو رأى مخالف لأيهم

لو قلت إى حاجة ضد الى همه بيقولوه

و مش معنى غن الحكومة قالت ان الانتماء لجماعة الاخوان المسلمين جريمة

يبقى انا اسلم و أقول آآآمين و أرضى إنى أتحاكم و أقف صاغر قدام نظام أصلا بائر و فاسد

و بدون وجه حق

فى حاجه فى النيا إسممها "كلمة حق فى وجة سلطان جائر"... فى حاجه فى الدنيا إسمها أقول "لأ" و باعلى صوت .. لانى على حق

اما بالنسبة لعبد المنعم

سواء دفاعه عن هويدا .. او دفاعه عن عبد الكريم .. او دفاعه عن اى حد تانى معتقل أيا كانت توجهاته
فهذا لا يعنى دفاعا عن أراه .. او اتفاقا معه فيها .. بس احنا عندنا مبدأ.. ما ينفعش واحد يعتقل علشان قال رأيه ..

سيبه يقولى الى هوه عايزه .. ان شاالله ايه .. ما عدا طبعا المساس بالاديان..

و يكون فى علم حضرتك .. عبد الكريم سبب سجنه شتيمة الريس
مش الالحاد

من امتى و النظام المصرى بيحاكم الملحدين
همه حرين
" و من إهتدى فانما يهتدى لنفسه .. و من ضل فعليها"

انا هويدا .. حتى لو كانت فبركت .. و دا مستبعد جدا .. و حتى لو كانت بعض القصص الى بيتجبها مش حقيقة
أنا بس بانصح حضرتك تقرب من حد من اوساط الاخوان .. الناس الى شافوا الامرين فى السجون .. على مدار حكم البلد دى .. عبد الناصر و السادات و عصر مبارك الأغر

و مش معنى ان فى حجات متفبكره .. ان دا مش بيحصل

عبد المنعم بيدافع عن الحريات .. عبد المنعم ذات نفسه شاف الويل فى اعتقالاته المتكررة

ما حدش هيحس بيه و لا بالقضية الى هو عايش علشانها .. غير فعلا انسان عاش نفس محنته و شرب المر كعان .. زى ما بيقولوا

و بعدين كمان فى حاجه .. مش عايزين نغنى كتير على شرف مصر و الإساءه لمصر ..
"رحم الله أمرء أهدى الى عيوبى "

لما انا يبقى فيا حاجه غلط .. ما اتكسفش اقولها قدام الناس ..
و لكن لما بقى نحاول نعتم عليها و نخبيها .. لانها اصلا وصمة عار فى جبين مصر .. و بشهادات عالمية ان مصر من اول عشر دول فى تصنيع ادوات التعذيب

لو فيا غلط .. يا نصلحة علشان ما نقولش الناس بتقول .. يا إما يتفضح علشان دى إحدى وسائل التغير

و علشان تكون عبره و عظه لكل الناس

زى حكم الرجم علنا قدام الخلق للزانى او الزانية

عموما يا اخ مانيجر
" الاختلاف فى الرأى لا يفسد للود قضية " و دى أهم قيمية بيفتقدها مجتمعنا المصرى :)

جزاكم الله خيرا

AbdElRaHmaN Ayyash said...

:) ياريت تقولولنا أخبار وقفة شبرا
ربنا ييسر ويتقبل منكم

The Manager said...

تمام الإختلاف فى الرأى لا يفسد للود قضية
واشكرك على كلامك وانا كمان بحترم حضرتك جدا جدا...

انا طبعا زى ما قلت فى البلوج بتاعك انى اتمنى انه يطلع بالسلامة لأنى مش هحب الضرر لحد
والفكرة إللى قلت منها كلامى هى ليست إنكار أخطاء الحكومة و كذا إلى أخره
دة شئ كلنا عارفينه موضوع الفساد دة .. ولكن انا الواجب انى اغير الباطل بلسانى اى النصيحة مش انى افضح المخطئ واستعين عليه بغير المسلمين علشان هو ظالم ولا فاسد ولا أى حاجة
لأن دة ممكن يجعل مصر عراق صغير لما الولايات المتحدة مثلا ولا انجلترا تتدخل علشان تنقذ الشعب المصرى !!
وتفضل تنقذ فيه 100 سنة لحد ما ينقرض من الإنقاذ
وكمان فضح الحكومة علنيا كدة ليس من هدفه الإصلاح إطلاقا ولكن من هدفه بيان فساد الحكومة وتغييرها وبالتالى هيحصل فتنة وحرب طائفية زى الفلسطينيين فتح وحماس إللى استحلوا دماء بعض !! وكلهم فى النار ليس فيهم شهيد واحد (المسلمين الذين تقابلوا بسيفهما) فى صراع على الحكم !!
كل دة بيصنعه زعيم يود الخروج على الحاكم فمن الممكن ان يتسبب فى قتل المئات بل الألوف فى الحروب الأهلية واحيانا تقوم السلطة الحاكمة ببتر الفرد الخارج عن الجماعة من باب درء الفتنة وارتكاب اخف الضررين
وكذلك الصبر هو من باب اخف الضررين
إلى ان يفتح الله علينا من عنده

أروى الطويل said...

ربنا يحميك يا آيه

mazagat said...

أول مرور لي هنا على هذه المدونة
وقد تنجح في أن تجعلني زائرا مستمرا لها

بصراحة لا اعرف فيلم البوابة المصرية

ولا اللي عامله أحمد شلبي

لكن فهمت من كلماتك أن في حلقك غصة كريهة كالتي في حلقي وحلق هذا وهذه وذاك وتلك وهم وهن وهؤلاء وكلنا جميعا ..

لكن ثقي أختي ..



ما زال هناك أمل ..

ويقولون متى هو قل عسى أن يكون قريبا



... مزاجات

المـ(همس)ـشاعر said...

الإخوان.. و الكثير من أصوات المعارضه .. انتهجوا نهج النصح كتير

من أيام عبد الناصر
و ايام السادات كان الاستاذ عمر التلمسانى بنفسه بيقعد مع السادات و ينصحه

بس ما كانش بتجيب فايدة

مش معنى دا اننا نتخلى عن نهج النصح
بس ينفع اوى نستعين بيه مع أساليب أخرى منها فضخ المخطأ

و الا لما كانت هناك حدود مثل الرجم و قطع يد السارق امام الناس

دى حاجه..

تانيا بقى مين قال ان عبد المنعم بيستعين بالكفار على المسلمين ؟؟
اولا لو تقصد كريم .. هو مش بيساعده على الحكومة .. هو بيدافع عن انسان اعتقل بسبب رأيه و انه شتم مبارك

مش حتى علشان سب الدين

ثم فى حاجه تانيه .. ايه وجه الشبه الى هيخلى مصر عراق تانى .. ؟
هو فى حد بيقول للولايات المتحده تعالى ؟

و على فكره حضرتك ممكن تتطمن جدا .. لان دا مش هيحصل أبدا على الاقل طول ما الريس فيها
لانه الحمد لله بيعمل لأمريكا كل الى هيه عايزاه .. الى هى مش هتعرف تعمله اصلا لو دخلت

و بعدين أمريكا عمرها ما هتعرف تدخل مصر بتهمه التعذيب .. لانها ما شاء الله ما تتوصاش فى الحكاية دى .. و لا أصلا يهمها الشعب المصرى فى حاجه .. و لا انه مدعوك فى الارض..

و الى دخلها العراق .. مصالحها هى لوحدها .. النفط .. و السلاح النووى الى لو كان موجود كان ممكن يهدد سيادة حضرتها

و بعدين مين قال ان فضح الحكومة ليس من هدفه الإصلاح؟
دا وسيلة ضغط علشان تغير من سياستها المحلولة دى
و طول ما هى مش هتتغير .. طول ما احنا هنفضل نعارض و نتكلم .. و دى فى حد ذاته نصيحة أصلا

هو احنا يعنى يوم ما الحكومة تبطل تعتقل فى الناس الأبرياء .. و تبطل اطلع عنين اهلهم فى السجون .. و تبطل تقتلهم جوه السجون و بعدين تقول هربوا
و يوم ما فعلا تقاوم الفساد

ساعتها احنا هنفضل نعارض .. لا طبعا .. هى بس تحترم الحريات .. و يادار ما دخلك شر


فى حاجه بقى أخ مانيجر
أولا ما يفعش اننا ندخل فى نوايا الناس و نقول انهم بيتاحروا على الحكم و علشان كده قلتلوا بعض

و لا اننا نحكم عليهم بجهنم

نحسبهم شهداء لو فعلا بيدافعوا عن انفسهم

اظن المقتول دون نفسه و عرضه شهيد
و مش احنا برضو الى هنقول شهداء و لا لا

فى حاجه أخيره ..
مش عايزين نردد كلام الحكومة اننا عايزن نخرج على الحكومة و نعمل انقلاب و نستولى على الحكم

كل دى إتهامات بائدة الصراحة .. و معروف انها خاوية و مش صحيحة

و مصر رغم ان فيها ناس بتقول الحق و بتحاول تصلح من زمان .. سواء اخوان و لا غيرهم .. و الحمد لله ما حصلش فيها فتنه طائفية و لا الكلام دا كل

و الفرق هنا .. الى بيكون عايز يصلح بهدف الاصلاح .. و الى ممكن تكون من وسائله الوصول الى مناصب اداريه عليا تمكنه من تحقيق الهدف دا

و فرق بين الى عايز يوصل للحكم بس .. و وواخد الإصلاح لبانه و سلم فقط

و فى الاخر ..
و على الباغى تدور الدوائر

و ربنا عالم بالنوايا ..

ربنا يكرمك حضرتك .. عايزين بس نغير من منهجيتنا فى التعامل مع الظلم .. لان السكوت الكتير فعلا بيعطيه مسوغ للتمادى اكثر فى الظلم

و مش عايزين نرفع شعار "ما فيش فايدة"

جزاكم الله خيرا .. و هدانا و اياكم :)

المـ(همس)ـشاعر said...

ملحوظة بس

ربنا العالم بالشعب المصرى قال فى كتابه

"إستذل قومة فأطاعوه "

و لما سيدنا عمر سأل سيدنا عمرو ابن العاص عننا قاله

بمما معناه مش فاكره بالظبط النص
"قوم ركوب لمن ركب "

أتمنى ان لا يكون هذا ينطبق علينا
على الاقل على جيلنا

بلاس تكون السلبية دى صفة لصيقة بينا من أيام الفراعنه لغاية دلوقتى
عايزين نتغير بقى و يبقلنا صوت


جزاكم الله خيرا

SAMT ~~ said...

بذكرك بسورة الشرح ..
السوره اللي لطالما تذكرتها كلما احسيت باليأس ..

أَلَمْ نَشْرَحْ لَكَ صَدْرَكَ
وَوَضَعْنَا عَنكَ وِزْرَكَ
الَّذِي أَنقَضَ ظَهْرَكَ
وَرَفَعْنَا لَكَ ذِكْرَك
, ,
فَإِنَّ مَعَ الْعُسْرِ يُسْرًا
إِنَّ مَعَ الْعُسْرِ يُسْرًا
, ,
فَإِذَا فَرَغْتَ فَانصَبْ
وَإِلَى رَبِّكَ فَارْغَبْ



ومرورا بيوم امس فكان شئ جميل جدا مشاركتك انت والاخوات ويارب ربنا يحميكم يارب

أحمد عبد الفتاح said...

ايه
انتي صح
وهتعملي كتير للبلد ده
أنتي بنت اه بس مصرية ومش ضعيفة ذي ما قلتي والدليل وقفتك قدام النيابة كانت وقفة راجل
بارك الله فيكي
وياريت ربع بنات الاخوان زيك
وصدقيني طول ما فيه حد ذيك
يبقي أكيد مش هتاخد
ولا ايه ؟

The Manager said...

انا عايز اقول حاجة بس

كريم اتحبس علشان إزدراء الأديان مش علشان شتم مبارك ولا حاجة

والدليل أن مئات المدونات م بيعملوش موضوع إللى ويشتموا فى الريس وفى جمال مبارك وفى الحكومة واحد واحد بالأسم

جرائد المعارضة نفسها (المحترمة ) بتشتم فى الريس كل يوم

ومحدش بيتقبض عليه ولا حاجة فأشمعنا عم كريم دة لما شتم الريس دلوقتى راحوا حبسينه !!

ما الكل بيشتم ومحدش اتقبض عليه !!!

انا بشوف قمم فى السفالة فى المدونات وسباب وحاجات ملهاش دعوة بأى دين بيقول كدة !!

واسف على حدة اسلوبى بس الموضوع دة واضح قوى يعنى

اصرار أمل said...

آيتى الحبيبة :
ليس معنى كونك بنت ؛ أن تتناسى دورك فى الاصلاح ؛
دعينا من مجتمع يرفض الاعتراف بالاصلاح كمبدأ فما باله ان جاءه من فتاة ؟!
غاليتى : ضعى لنفسك طريقا ؛ تلمسى خطاه وسيرى على نهجه ؛ أخلصى نيتك ؛ وأصلحى عملك ؛ وثقى فى عطاء الله لك ....
* ملحوظة : أتابع مدونتك منذ البداية ؛ وكتبت لك تعليقا فى أول موضوع لكن ؛ لعله محى ؛ أو لاأدرى : المهم ان مدونتك راائعة جداا
أسأل الله أن لايحرمك الأجر ؛؛؛
* ملحوظة 2 : للحبيبة آية - همساية _
ان كنتى تقصدى الآية التى فى القرآن فهى ( استخف قومه فأطاعوه ) وليست استذل ؛
تحياااتى لكما

آية said...

السلام عليكم :

أخ مانجر : قرأت ردود حضرتك والمناقشة مع همساية وأظن أن مواضيعي القادمة عالمدونة عموما هتشرح مدى اتفاقي أو اختلافي مع حضرتك في وجهات النظر

جزاكم الله خيرا للمرور والتعليق

ـــــــــــــــــــــــــ

خطاب :

مش هيجي اليوم اللي انتا خايف منه .. لأن ربنا وعدنا بالنصر

__________________________

وضاح :

ربنا يكرمك يارب .. بس هو أنا كده كده مش مصدقة أن المرأة ضعيفة أنا بتكلم عن نظرة مجتمع

جزيتم خيرا للمرور

ــــــــــــــــــــــــــ


عبدالرحمن عياش :

الاخبار نازلة عالمدونات ونازلة في البوست الجاي ان شاء الله

_________________


أروى الطويل :

ربنا يحمينا جميعا يارب يا أروى .. ويجعلنا من المدافعين عن الحق دائما

ـــــــــــــــــــــ

مزاجات :

أهلا بحضرتك في المدونة

وإن شاء الله تعجبكم وتداوموا على زيارتها

وطبعا في أمل ولن نفقده أبدا بإذن الله
______________________________


صامت (هكذا قرأتها ) أهلا بحضرتك هنا

و اشتدي أزمة تنفرجي ..

مكنتش أعرف أن حضرتك كنت معانا في الوقفة .. ربنا يكرم حضرتك رفعت من روحنا المعنوية بعد الانتقاد اللي أخدناه ..

جزيتم خيرا للمرور والتعليق

____________________

أحمد :

لا مش هنتاخد .. متقلقش ..

وقصة أنها وقفة راجل

لا دي كانت وقفة بنت :D

أصل يعني بردوا احنا بنات

ربنا يخليك على الاطراء الذي لا نستحقه

_________________________


اصرار أمل :

جزاك الله خيرا على ذوقك .. وان شاء الله هنفذ نصيحتك وربنا يكرمك للمتابعة

_______________


آية :

بطلي خناقات ومناقشات :D

mohamed said...

ايه انتي صح يا بنتي

يكفيكي فخراً انك بترفدي الظلم وتريدي اعلاء كلمة الله


ايه همس انا بختلف معاكي في شئ وهو أحترامك لمنجر

انا بحتقر كل المدافهين عن الباطل وكارهي العزة للاسلام

ويكفي وقول الله في أمثالهم

(( وَلَوْ أَرَادُوا الْخُرُوجَ لأَعَدُّوا لَهُ عُدَّةً وَلَكِنْ كَرِهَ اللَّهُ انْبِعَاثَهُمْ فَثَبَّطَهُمْ وَقِيلَ اقْعُدُوا مَعَ الْقَاعِدِينَ))
سورة التوبة ايه 46

وقوله تعالي
((لا تَجِدُ قَوْمًا يُؤْمِنُونَ بِاللَّهِ وَالْيَوْمِ الآخِرِ يُوَادُّونَ مَنْ حَادَّ اللَّهَ وَرَسُولَهُ وَلَوْ كَانُوا آبَاءَهُمْ أَوْ أَبْنَاءَهُمْ أَوْ إِخْوَانَهُمْ أَوْ عَشِيرَتَهُمْ أُولَئِكَ كَتَبَ فِي قُلُوبِهِمُ الإِيمَانَ وَأَيَّدَهُمْ بِرُوحٍ مِنْهُ وَيُدْخِلُهُمْ جَنَّاتٍ تَجْرِي مِنْ تَحْتِهَا الأَنْهَارُ خَالِدِينَ فِيهَا رَضِيَ اللَّهُ عَنْهُمْ وَرَضُوا عَنْهُ أُولَئِكَ حِزْبُ اللَّهِ أَلا إِنَّ حِزْبَ اللَّهِ هُمُ الْمُفْلِحُونَ))
سورة المجادلة ايه22
يعني مش هتلاقي مؤمن بيدافع عن اعداء الله من الظالمين والفاسقين

ربنا ينتقم منهم مهما ومؤيدنهم

mohamed said...

صحيح يا همس

دي الاية

(( فَاسْتَخَفَّ قَوْمَهُ فَأَطَاعُوهُ إِنَّهُمْ كَانُوا قَوْمًا فَاسِقِينَ))

سورة الزخرف ايه 54

The Manager said...
This comment has been removed by the author.
The Manager said...

إيه يا عم محمد
ما تحترم ذاتك شوية دا احنا ضيوف عند ناس

متحترمنيش يا عم
احترم نفسك
انا برضه بحترمك !!

آية said...

محمد :

أنا عارفة أني صح .. بس نفسي الناس تعرف فين الصح وفين الغلط .


ربنا يكرمك ويجزيك خيرا

The Manager said...

انا عملت بوست مخصوص علشان حضرتك تعرفى مين غلط ومين صح

http://ro7ifi7a.blogspot.com/2007/04/blog-post_26.html#links

mohamed said...

هقوله مين قالك اني مش بحترم نفسي بالعكس انا شخصية في قمة الاحترام اما اللي مش بحترمه فهو أنت


البوست بتاعك دا ملوش اي قيمة لانك بتاخد الحق وتحورة علشان تحقق بيه الباطل بتاعك