Friday, June 8, 2007

خروج منعم

الايام اللي فاتت كان فيها أحداث كتيرة جدا



وتأملات داخلية وخواطر كتير


يمكن كان قمتها خبر خروج منعم وتداعياته



صاحباتي يكلموني :


آية عندنا ليكي خبر فظيع


ايه يابناتيت ؟؟



شفنا منعم النهاردة في الكلية


منعم كان عالعاشرة مساء



أي حاجة بس لازم سيرة منعم في النص



شيء غريب فعلا يدعو للتأمل





ناس عمرها ما كانت تعرفه ... يمكن كان ممكن يعدي من جمبها ومش هتاخد بالها منه


اما دلوقتي مجرد معرفة خبر عنه بيبقى شيء عظيم ليهم



افتكرت ساعة عرض سنة أولى اعلام في مادة اللغة الانجيلزية


ولما صاحباتي عملوا مادة مرئية عن المعتقلين



وأول ماجت صورة منعم راحت الناس واقفة وفضلت تصفق


مرتين يحصل نفس الموقف


فجم الطلبة سألونا : مين ده ؟؟



واستغربوا أوي لما عرفوا انه صحفي شاب معتقل


في الفترة اللي غاب فيها منعم


أظن أنه تحول لبطل بين المثقفين


الكل كان بيتابع أخباره وآخر التطورات ويبلغ الباقي


اللي كان عنده صورة ليه كان بيوزعها



لأول مرة أشوف شخص الناس مهتمة بأخبارها زي مابيهتموا بالممثلين والمغنيين



بس الفرق


أنه صحفي صاحب كلمة




تأملت كتير أوي في الموضوع ده



ايه اللي خلى منعم بطل في نظر الشباب دلوقتي ؟؟




هل هما مفتقدين صورة البطل صاحب الحق فوجدوها في منعم ؟؟؟



هل كان ييئسوا أن جيل الشباب بتاعهم يكون في حد قوي ومؤثر ولاقوه في منعم ؟؟



ولا لأن منعم كان صدى نفس كل واحد فيهم


كل واحد كان شايف نفسه في منعم وكان يتمنى يعمل اللي منعم بيعمله



ويتعرض للي اتعرضله بس في 100 حاجة تمنعه



فتضامن مع منعم لأن منعم كان بيمثل له صورة من الحلم بتاعه ؟؟



اممممممم




ممكن تكون كل الاسباب دي أو غيرها


أكيد في نفس كل واحد اجابة



شيء آخر لفت انتباهي



مش كلنا كنا نعرف منعم



ومع ذلك الغالبية تضامنوا معاه



ياترى لو الغالبية دي احتكت بمنعم بعد كده



هتفضل محتفظة بنفس الصورة المشرقة عنه



ولا الوضع هيختلف ؟؟



صورة البطل الانسان جواهم هتختلف بعد التعامل المباشر ولالا






منعم دلوقتي خرج ... والحمد لله انتهت أحد المهمات الصعبة من حياته



بس في رأيي


تنتظر منعم مهمة أصعب بره



مهمة التعامل مع المئات من المتضامنين معاه


المئات اللي بينتظروا منه ردود فعل تنطبق على مارسموه عنه



هتبقى مهمة صعبة جدا في نظري


انه يحافظ على كل هؤلاء المتضامنين معه



ويقدر يتعامل معاهم وييتوجهوا معا جميعا لنفس الهدف والغاية



بردوا مع خروج منعم ظهرت حاجة تانية عندي



مستقبل حركتنا ( مش هتاخد )



الحركة الوليدة اللي كانت أول قضية ليها منعم



افتكرت اللي كنا بنعمله ... والتفكير والتخطيط


وازاي أي فكرة كنا بنطرحها ونفضل نتناقش هتخدم القضية ولالا



افتكرت تعبيرات الوجوه .. ردود الفعل على كل اللي كان بيحصل



افتكرت وقفة شبرا


وسيلانترو


و زيارة والد منعم



افتكرت اللي اتقال لنا على الحركة


الانتقادات والتوجيهات



افتكرت كلمة الاستاذ : صبحي صالح



انها حركة مجنونة


ولما سألناه المعنى وهل هو جيد ولا سيء



قال لنا :


مجنونة تحتوي الكثير والكثير من الابداع


الكثير والكثير من المخاطرة



ولما سألناه : توافق بنتك تبقى معانا



قالنا : لا



مش هو لوحده اللي كان رافض ظهور البنات


الغالبية العظمى كانت رافضة



يمكن بسبب ده كل بنت نعرض عليها الموضوع ترفضه رفضا قاطعا الا من رحم ربي



افتكرت كلام ( لالي ) الصحفية الاسبانية معانا



وليه الحركة وهتعملوا ايه من وراها


طيب وعلاقتكم بمنعم هل كنتم تعرفوه



ولما قلنا لا


استغربت اوي



امال كنتم واقفين ليه عند النيابة


طيب منعم يمثل لكم ايه ؟؟


قلنا لها منعم واحد من 18 ألف



منعم خرج



لسه 18 ألف منعم



يمكن قضية منعم كان من الايجابيات فيها تضامن عدد كبير معاه


وتأثره بيه



فهل يا ترى ال 18 الف الباقيين هيحظوا بنفس الدعم اللي اتوجه لمنعم



بردوا كلام ابراهيم شرقاوي وتعليقه في بلوج الحركة


مع أنه معجبنيش في حاجة بتاتا


بس هو كان بيسأل فيما معنى كلامه



انتوا تظنوا انه بسبب الحمله هو خرج


انا لاعتقد ذلك بتاتا



وأنا في رأيي


أن الحركة ممكن متكونش عملت حاجة كبيرة



بس يكفيها شرف المحاولة


يكفي أنها حاولت تقول : لا



حتى لو كانت لا بتاعتها بصوت واطي



أنا بعتبر أن منظر الامن يوم وقفة منعم عند نيابة شبرا


كان انتصار للحركة



لان ده معناه انهم خايفين من اللي هنعمله



ويمكن احنا معملناش حاجة أثرت في خروج منعم



بس لسه فيه 18 الف


اكيد بعون الله هنعمل ونأثر


وكل تجربة هتفيدنا وتمنحنا نضج أكبر



_____________




آخر حاجة بقى :



هو شعور تملكني وأنا بكلم منعم عالموبايل


قدرا بتصل على هاتف والدته أبارك لها



لاقيت أن الموبايل بقى لمنعم وهو اللي رد



كان شعور غريب جدا



أنك تكلم إنسان متعرفهوش ولا يعرفك



بس هو أثر في حياتك بحاجة



وهو ميعرفش أنه عمل كده



وميعرفش بردوا أنتا كنت بتعمل ايه عشان التأثير ده



كانت أول مرة في حياتي أتحدث مع شخص


أنا نزلت مظاهرات عشان قضيته


وكنت بقنع الناس بالتضامن مع قضيته


وأنا شخصيا معرفوش



وبعدها كلمني وسألني :


انتي مين ؟؟



أنا الصراحة لأول مرة مالقيش إجابة عالسؤال ده



مش عشان انا مش عارفة اسمي



بس لأني معرفتش أقول ايه خالص



فكل الاجابات حينها سواء بالنسبة لمنعم



بس أكيد هتختلف معايا



كان شعور جديد تماما اتعلمت درس مفيد جدا منه


ويارب يفيدني دايما في حياتي



_______________



يمكن الكل دلوقتي بيدعوا الاخوان لدراسة تجربة منعم والاستفادة منها



بس أنا متشائمة شويتين



وحاسة أن كل الامور سواء



اللي خلاهم ميتحركوش الحركة الكافية ساعتها



لا أظن انهم هيخليهم يفكروا دلوقتي في الموضوع




يمكن في نظري احنا اللي المفروض ندرس قضية منعم



لاننا كنا متأثرين جدا عشانه واتحركنا عشانه



فهل ياترى كل المعتقلين احنا اتحركنا عشانهم كده



هل ياترى كلهم



نزلنا عرضهم عالنيابة ؟؟



عملنا لهم مظاهرات ؟؟



صممنا لهم بنرات وحملات ؟؟



وقفنا قدام الاعلام نشرح قضيتهم ؟؟



في رأيي نبدأ بنفسنا


وبعدين نطالب الباقي



يوم مااحنا نعمل واجبنا تجاه المعتقلين كلهم سواء اخوان ولالا



ساعتها الاخوان وغيرهم هيعملوا رد الفعل الصح



يبقى نخلي شعار ( مش هتاخد )



احنا اللي هنبدأ



ومش هنستنى رد الفعل من حد



احنا اللي هنعمل رد الفعل ونصنعه باذن الله



16 comments:

أحمد عبد الفتاح said...

بجد نفسي اصقف
بس البلوج بوست مفهوش تصقيف
كلامك جميل جدا
والدعوات الي فيها مهمه جدا
بس انا هزود عليهم دعوه
بدعوا كل واحد يدور له علي منعميعني يدور ليه علي معتقل يبقي هو قضيته
يمكن فكره مجنونه بس انا مجربها مع حاجه تاني ونجحت جدا

شاويش said...

همممممممم
منعم يمكن يكون خرج

بس سيبوكوا من المنعم الي جوة المعتقل

في 70 مليون منعم برة المعتقل

ومن اكبر الحركات الي خاف كان معتقل والي اترعب كان معتقل

والي انتقد بدون سبب كان معتقل

والي مقدرش يعمل حاجة كان معتقل

منعم لسة مخرجش منعم فكرة معتقل

محمد عبدالجليل said...

البوست جميل ولكن ليا تعليق صغير الاخوان عمرهم ما اهتموا بواحد معتقل وسابوا الباقي ممكن يكون الانسان المعتقل مأخدش الشهرة الي اخدها منعم لكن بردو اخوانه كانوا واقفين جنبه دا الواحد لما بيجيله استدعاء اتفرجوا علي الدعوات والاخوة كلهم واقفين جنبه ومش بيسيبوه

dr-killer said...

انا معاكي يا فلسطينية الهوى مصرية الارض
ياتارى باقي الناس الي زي منعم
هيلاقو نفس الدعم
الحمد لله منعم خرج انا صحيح معرفوش و متاثر لقصتو لانها بتديني انطباع خاص
بس الباااااااقي مين معاهم
معاهم ربنا
شكرا ليكي على البوست

reem said...

مش عارفة اقولك ايه؟ قرأت البوست كذا مرة وعايزة اكتب تعليق بس اهو دلوقتى بكتب
كلامك متفقة معاه 100%100
منعم دلوقتى فى امتحان صعب الناس من بعد ماكانت قاعدة تدعى وفرحانة بخروجة ياترى لما يتعامله معاه ايه اللى هيتغير؟ صح اوى
فى غير عبد المنعم ناس كتييييرة مظلوميين ولسة هيعملو ايه دلوقتى؟ او هنعمل ايه؟
وكلامك بردو صح فى ناس كتيير مكانتش تعرف عبد المنعم ولما عرفته وعرفت هوا ليه معتقل تضامنت معاه ولقوا جواهم صورة منعم اللى مسجون مسجون افكارة مسجون فى كل حاجة كل دول لقوا الصورة فى عبد المنعم فتضامنو معاه
البوست جميل ربنا يحميكى بس فى غير عبد المنعم كتييير ومنعرفش عنهم حاجة

Anonymous said...

www.khirat-elshater.blogspoزورو مدونات ابناء المعتقلين وخاصة مدونة ابناء المهندس خيرت الشاطر

AbdElRaHmaN Ayyash said...

ممممم
و الله المشكلة فعلا مش منعم
منعم كان رمز بغض النظر عن هو مين
كان رمز لم الناس حواليه
ممكن لو أي أخ تاني مدون اعتقل مش هيحصل ده .. لأن مش له أفكار منعم
ولو اعتبرنا ان الشغل اللي اتعمل على النت وعلى الارض نجح .. ( بصراحة هو ما نجحش اطلاقا ناحية القضية وان كان نجح اعلاميا ) لكن على اعتبار نجاحه .. فنحن نحتاج الى 16 او 18 الف حملة من هذا النوع كي يفرج عن معتقلينا السياسيين .. يا ترى نقدر ؟؟
أكيد لا
فلازم ندور عن عمل تاني . يكون مفيد .. نقدر نوصل به فكرتنا للي مبيسمعوش
عموما البوست جميلة
وربنا يخلليلكم حركتكم
وسلام

AbdElRaHmaN Ayyash said...

http://img183.imageshack.us/img183/6984/1000kn5.jpg

شوفي الصورة دي
D:D انا الزائر رقم ألف
عندك جوايز؟؟

mohamed said...

تحليل صحيح الي حد كبير


منعم واي مظلوب رمز

والناس محتاجة لبطل ورمز

وفي ابطال كتير عايشن متسلطش عليهم اي ضوء اعلامي

بس جواهم ابطال مستنية شرار

النجمة الصامدة said...

شعرت بأني أقرأ عقلا واعيا بين السطور
فكرت في كثير من الطرح
اتفق معكِ في دعوتك

بورك قلمك وفكرك اختي

reem said...

انتى سافرتى عن المدونة كمان ارجعى للمدونة حتى

المجاهدة said...

ربنا يكرمك
:)
كنت سعيدة اوى بقرائة البوست ده
:)

ربنا يكرم الجميع و يتحركو لو حركة ايجابية فعلاً و ليها فادية كبيرة خير كثير
و يصبر البقية الباقيين


عجبتني اوى اما بتقولي ان شخص اثر في حياتك و هوا نفسه مايعرفش.. و انتي عملتي حاجة ليه و هوا مايعرفش
:)
بجد سبحان الله
:)

الحمد لله على تيسيره الكون بحكمته و بما يره خيراً لنا
:)

just-amuslim said...

تحية ايتها الفاضلة ارسلها ...

وان خالفك وخالفني الرأي بعضهم ..

يكفيك انه اعذار لك امام الله ..وان لم ينجح هذا العمل ...

يكفيك ان رب السموات والارض يرى ويسمع ..

يكفيك ايتها الفاضلة يقين اراه بعيني ..فكما كانت معجزة السماء لأهل الكهف ..فليس على ربي بعزيز ان تكون معجزة الاعفاء عن الاسرى واطلاق السراح ..لأجل وقفة شبرا ..او غيرها ...

يكفيك ..وان كنت على عملك تحتاجين الى المزيد ..

كنا بالامس نقول ..هناك الف ياسين ..
والان اقول ..هناك الف منعم ..


تحية ارسلها ..

فاقبليها ..

والسلام ختام ...

عبدالمنعم محمود said...

اولا اتوجه اليكيبالشكر عن تضامنك معي وثانيا عن هذه الكلمات الراقيه
واتمني ان نسطيع جمعيا ولست وحدي علي التفاعل مع هذا الكم من المتضامنين وأن نكون جميعا نواه لحركة شبابية جريئة ومثقفة وتحمل هم هذا الوطن

فلسطينية الهوى said...

هرجع أرد على الجميع تفصيليا

بس دعواتكم لان اختي تعبانة واتحجزت في المستشفى

Human said...

فعلا فيه لسه كتير معتقلين ..بس للأسف ماحدش يعرقهم
...
أتمنى ربنا يرجع أختك بالسلامة