Wednesday, July 11, 2007

ربنا ياخدهم


حاسة بألم وحزن فظيعين


و ان قلبي اتكسر مية قطعة


حاسة بذهول غريب


برغبة شديدة في الصراخ


حاسة بغضب



مش عارفة بجد أعمل ايه


الناس بقت سيئة درجة أولى


مش عارفة لامتى هنفضل نسيء الظن في بعض


ونفسر الكلام بمية معنى


والكلمة بألف


ليه كده بجد


رسموا في خيالهم صورة عني لاتمت للواقع بصلة


وكل تصرف بيدي للصورة ابعاد مش حقيقية



نشروا الصورة دي وتغاضيت


بس كده كتير


انا عارفة نفسي كويس وعارفة أني صح


عارفة آية الحقيقية


ومش لازم عندي يعرفوها لانهم مش بيفرقوا معايا في حاجة


بس أنهم ينقلوها لاشخاص مقربين ليا وبحترمهم


وياخدوا ولو جزء من الصورة الغلط


يبقى حسبي الله ونعم الوكيل



وربنا ما يسامحكم أبدا


وان شاء الله ربنا هينتقم منهم شر انتقام يوم القيامة


وفعلا زي ما صاحبتي قالتلي


لو احنا بنطبق الاسلام صح كانوا المفروض يتجلدوا



حسبي الله ونعم الوكيل

33 comments:

fnan_geology said...

شامم ريحه شياط

خير

انا احتمال اكون فاهم
شويه من الكلام
حبه
حاجات
بس

هيا
نصيحه
واحده
مدام انا صح ومتاكد انى انا صح
مهمنيش اى حد
واللى بيقول عليا كلام مش صح او بيظن بيا

لاما انا غلطان لان فى افعال او اقوال منى مش موضحه قوى وهو بيفهما غلط
او هو ااساسا متعلمش حاجه اسمه الظن وان بعد الظن اثم
وان مينفعش اغتاب اواتكلم عن حد بحاجه انا مهنديش دليل عليها
وده بقى
عايز تربيه من جديد
وفى النهايه
كله بثوابه

وسلااااااااام

reem said...

ايه مش انتى صح ولايهمك اى حد ولا يهمك اى حد ولا يهمك يااية

المهم انك تقولى بس حسبى الله ونعم الوكيل

وانسى اى حاجة انسى وربنا هيرجعلك حقك عايزاكى بس تقولى حسبى الله ونعم الوكيل عشان حقك يرجعلك من غير اى كلمة زيادة ومش عايزاكى تضايقى بتحصل صدقينى كتييييييير

متزعليش ولا يهمك وكبرى منهم ومن اى حد يضايقك
يلا يااية انسى والف الف الف الف الف الف الف الف مبرووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووك عالنتيجة ربنا يوفقك ويحميكى

محمد شاكر said...
This comment has been removed by the author.
محمد شاكر said...

رغم اني مش فاهم الموضوع قد كده الا اني مقدرش اقول غير فعلا كويس ان حضرتك لجأتي لربنا وقولتي حسبي الله ونعم الوكيل فانتي لجأتي للي مش حيضيع حقك ابدا ربنا يكرمك ويرفع اي ظلم عنك
والحاره سد

عيلة و عايزة افهم said...

اّية

فاهمة اللي بتتكلمي عليه
و فاكرة لما اكنت بتحصل حاجات قريبة و يبقى يمكن اهم حاجة عندي ساعتها إن الناس اللي باحبهم ما يتأثروش بالموضوع ده
بس مادام حصل
حاقولك على الحاجة اللي حصلت بعد كدة
الايام بتمر و بتنسي الكلام

و اللي بيفضل بعد كدة عند الناس القريبين مني دول هو اللي عرفوه عني من المعالمة طول الفترة دي

و ساعتها بيعرفوا الكلام ده كان صح و لا غلط
و بيفهموا الناس اللي قالوا كدة على حقيقتهم

صدقيني و لا يهمك

في الاخر الحقيقة بتبان
و بيظهر الكويس من الوحش

AbdElRaHmaN Ayyash said...

مس آية
:) دافعي عن نفسك
و لو انتي الصح فعلا و متأكده من ده
:) اذا فليذهب الجميع إلى الجحيم
-
ما تتخيليش اني بقول انك تدافعي عن نفسك تنشري الموضوع و تقولي ده وضعي و ده الحال
لا
على اضيق المستويات
لأن الناس .. زي ما انتي بتقولي
حاجه زي كده
وربنا يوفقك ويحميكي
و ما تشغليش بالك بأمثالهم

علاء said...

أنا معرفش مين دول
و اكيد مش معاهم
بس اللي اعرفه
انك لو مؤمنة انك صح
مش هيهمك كلام حد

و يوم ما اسمع عن نفسي كلام من حد
افكر شوية
الكلام ده صح و لا غلط
و هل انا صح و لا غلط
هل انا باطبق الاسلام صح و لا غلط

هل انا اللي استحق الجلد و لا الناس دول

هو ده التفكير الصح

تحياتي

dr-killer said...

انا مش فاهم ايه الموضوع بس الظاهر انهم جرحوكي
ويارب تكون الحكاية دي بتقوي آية مش بتضعفها

mohamed said...

هى الحياة كدة

شاويش said...

يا سلام مين قال الناس الس بتكلم عن حاجة مش عجباها تبقي الناس ده غلط

طيب انت لية الي غلط
زي ما انت زعلانة ان الناس بتزعل منك

او هو متشددين ووحشين

يبقي انت كمان مش كدة

يا اية رجعي نفسك والناس الي حوليك وبالتأكيد هتلاقي ان فيهم صح وفيهم غلط

وزي ما بيقولوا المؤمن مراء اخية


ومتزعليش من حد

noha said...
This comment has been removed by the author.
noha said...

بصى يا يويوتى

جايز انا مش عارفة الموضوع بتفاصيله
لكن

طالما انا واثقة من نفسى
يبقى كلام الناس بالنسبة ليا زى الهوا

بيعدى اه .. وبتحسه بيه .. ايوة
لكن مش بيأثر فيك
لانه هوا

جايز بيبقى صعب التنفيذ فى بعض الاحيان لكن لازم تبقى دى ردة الفعل

...

وفى نقطة تانية

لو مجموعة من الاشخاص اجتمعوا على صفة فيّا ..

ثقتى ايوة المفروض تبقى الاساس
لكن ده ميمنعش اعمل واقفة مع نفسى اشوف سبب الفكرة اللى عندهم دى ايه

وهتبقى اساس الوقفة دى هى الارتقاء بشخصيتى انا وفقط

:)

ربنا يكرمك يا حبيبتى

العميد ميت said...

رقم واحد : روحي المطبخ إعمل يواحد ليمون
رقم إتنين بلاش نرفزه قوي كده
رقم تلاته ماحدش يقدر ينتقدك
رقم أربعه ممكن أنا بوجه لنك نصح وإرشاد
رقم خمسه إقلعي الجزمه ونثريها علي رأسي ، لأني مافهمتيش
رقم سته ما أقدرشي أسيئ الظن بيكي لأنك إنسانه محترمه جدا والنشاط إلي شاركنا فيه سوا يشهد بذلك
رقم سته إرمي الجزمه بكل مافيكي في ضهري لأني هكون أكيد بجري
سلاااااااااام عايز انام

العميد ميت said...

أه نسيت
ياريت تستخبي عن العالم
لأني لو شفتك في أي حته عقابك هيكون شديد عشان مش بتحضري إجتماعات مش هتاخد
تدفعي 20 جنيه غرامه لمسؤول الخزنه لو سمحت أول ما تشوفيه

اليعقوبي said...

ان كنت مظلومة في هذا الامر يااختنا فاصبري فرسولك(صلي الله عليه وسلم )0
اؤذي في مثل ماؤذيتي غفر الله لكي وثبتك

بحب الحق said...

بصى يا أية

انا هتكلم بشكل عام شوية لأنى مقتنعة بحاجة

ان اى تجربة فى حياة الانسان حتى لو كانت مؤلمة اووووووى بتزيده خيرة اوووووى

بمعنى انك رغم ضيقك ده هتتعلمى حاجات مهمة اوووى ..هتفيدك بعد كده حتى فى الحكم على الاشخاص

فهمتى قصدى ؟؟

بس اهم حاجة مش تسيبى اى موقف فى حياتك يعدى كده وخلاص
.........
وحشانى اوى

فلسطينية الهوى said...

فنان جولوجي :

أهلا يا مصطفى أسعدني مرورك


وهو في حاجة أكتر من شياط شويتين

بس متفقة معاك في كلامك

ربنا يهدي ويصلح حال الجميع


___________________


ريم :


حسبي الله ونعم الوكيل فعلا


___________________


محمد شاكر :


أهلا بحضرتك وهو حقيقي مفيش في ايدي سلاح غير حسبي الله ونعم الوكيل ودعوة المظلوم مستجابة


______________________


عيلة وعايزة أفهم :

بجد الموضوع تاعبني شهور وأنا فيه وكل لما أقول تابوا يطلعوا تاني

أكتر حاجة زعلتني أن المقربين تأثروا

تصورت أنهم هيكونوا عارفيني أكتر من كده


يارب يصبرنا يارب


_________________


عبدالرحمن عياش :


أدافع عن نفسي يوم ما تكون عقولهم سوية


بس دول عقولهم ملتوية


أعرض عن الجاهلين أنسب حل مع عقول زي دي


_________________

علاء :


هو ده اللي عملته وعشان كده مش طايقة أنهم يألفوا ويسقطوا واقع حياتهم الغلط على أشخاص آخرين


ربنا ينتقم منهم


___________________


د. كيلر :


يارب يامحمد يارب

آية تبقى أقوى مش أضعف

_________________

محمد :

مش الحياة اللي كده

لان اصل الحياة الخير

الشر هو اللي كده


____________


شاويش :


أختلف معاك


لان الانسان عارف نفسه كويس

وانتا قلت بنفسك المؤمن مرآة أخيه


يبقى مرحش ادور على عيوبي عند واحد محتاج يتعلم ألف باء اسلام من أول وجديد


________________

نهى :

هقابلك وأشرحلك

وهتعرفي الضغط عالي عندي ليه


______________________


ميت :

دي محاولة لتصحيح الخطأ ؟؟

هحاول أسامحك


بس لا أعدك


________________


اليعقوبي :

أهلا بحضرتك هنا

وربنا يرزقنا الصبر


____________

بحب الحق

منورة يا بنوتة


ويارب تزيدنا التجارب خبرة وفهم ولا تتكرر مرة أخرى

Anonymous said...

ربنا يهديكى

نور said...

لو احنا بنطبق الاسلام صح كانوا المفروض يتجلدوا


ده على اساس ايه؟

وكمان ايه ربنا ياخدهم دى صعبة شوية

المؤمن كيس فطن

محمد السيد..مش حاسكت said...

ربنا معاكي ....
مقدرش غير إني أدعي لك ...

تعرفي يا آية ؟؟
كتير بنقابل نفس الموفف ... ونفس الاشخاص .... لكن برضه كتييييييييييير و مع الوقت الأيام بتثبت لنا وللناس كلها مين الكويس ومين اللي غير كده ...


مع الأيام الناس اللي اتأثروا بالكلام ده ... حيتأكدوتا من عكسه ... ومع الأيام نظرتهم للناس دي حتتغير ... وحيعرفوهم علي حقيقتهم ...


مع الوقت حيبان مين المحترم المخلص ومين اللي غير كده ...

ولغاية الوقت ده ... اللي اقدر أقوله لك ... شوفي ايه الصح .. ومين .. واعمليه ... وبعد كده .... لا يكلف الله نفسا إلا وسعها ...

لو إنت الصح ... الناس مسيرها تتأكد من كده ...

تحياتي ليكي ودعواتي ... وربنا ييسر لك أمورك ويحفظك من شرور خلقه ...

العميد ميت said...

لأ طبعا مش محاوله لتصحيح الخطأ
لأن مافيش خطأ أساسا
أوعي تكوني فاكره إني من إياهم
ماشي
وتبقي تقول لينا الميزانه وصلت كام دلوقتي

شقلبان said...

http://www.ikhwanonline.com/Article.asp?ArtID=29740&SecID=360


الرابط ده فيه مقال عن موضوع "آفة نقل الكلام"

بجد موضوع وافي وشافي

وهو نصيحة الي كل من يصاب بهذه الافة

ولكن

هذا بالطبع لا يمنعنا من انا احنا نحاول نكتشف عيوبنا ونحاول نصلحها
صحيح الجانب الوحش في الموضوع هو الالم النفسي اللي الواحد بيحسه

لكن الجانب الاهم هو ان احنا نحاول نخلي الكلام ده دافع لينا لان نتحسن اكثر واكثر ونكتشف عيوبنا ونحاول نقومها

المجاهدة said...

ايه ده :(:(

هوا ايه حصل؟؟؟؟ :(

alnagar said...

أيا كان الفعل لا ينبغي أن يكون رد الفعل هكذا .. أعتقد أنها حالة من عدم الاتزان النفسي اثر التعرض الي صدمة من أناس قريبين كنتي تعتقدي وتنتظري منهم شيء أخر ووجدتي العكس بس
المهم الان ان الانسان يتدارك الازمة ويعرف كيف يدريها بأقل الخسائر وأكثر المكاسب وعسي أن تكرهوا شيئا وهو خير لكم

reem said...

وحشانىىىىىىىىى اوى يارب تكونى احسن يااية

Caaaaat said...

مجاهدة .. حصل خير

أخ اعلام said...

في تعليق جميل أوي حد أضافه في التدوينة اللي قبل كدا قرأتيه ولا لا يا أية

Anonymous said...

لما الناس كلها تجمع علي حاجة

حينها يجب اعادة النظر مرة آخري

لعلنا نستفيد مما يقوله هؤلاء

واحد مش مع حد

مني said...

مش عارفة اقولك ايه
بجد انتي صعبانة عليا قوي
قل هل ننبأكم بالأخسرين أعمالا
الذين ضل سعيهم في الحياة الدنيا
وهم يحسبون أنهم يحسنون صنعا
قفي مع نفسك وشوفي انتي فين وبتعملي ايه
وحرام عليكي تدعي علي مسلمين زيك
اختلفوا معكي في الرأي
يا زعيمة التحررية والانفتاح
ربنا يثبتنا أجمعين

إخوانية مصرية said...

ايه
مش تسمعي كلام حد
مدام انتي صح
ومتاكدة انك صح
واحنا كمان متاكدي
وانا كمان متاكدة هههه
مش اوي يعني هههههه
كبري دماغك
مدام انتي صح ويبقي ولاتحطي في بالك
غيرة وحسد ورغي الاخرين
واعتبره دا نوع من انواع الدفع ليكي
انك تكوني ان شاء الله الافضل والاحسن
عند ربنا ولايهمك الناس
محدش هيتحاسب مكانا ولا احنا هنتحاسب مكانهم

ولنا في الحبيب المصطفي قدوة
انتي ناس حطوا عنك وصف مش كويس
تخيلي بقي المصطفي اتكلموا عن زوجه واتهموها بيها

احتسبوا ماقالوه عنك
ولك الاجر والثواب

وعلي العموم ياستي

هقول جاحة جدتي كانت بتقولها
لما حد كان بيجرحني او يشتنمي

الكلمة بتلف وبترجع تلزق في وش صاحبها

ربنا يوفقك ويشرحلك صدرك وييسرلك امرك

Anonymous said...

في ناس قالوا حكمة التربية أهم من التعليم
فعلا
مش لازم تتعلمي في القاهرة بس أكيد مهم ابوكي يربيكي كويس
ويعلمك الادب
وانتي مش صح
انتي غلط
انتي غلط
انتي غلط
وعاوزة حد يشكمك ويربيكي
تحبي اقول ليه ولا كفاية عليكي كدا
كفاية
انتي عارفه ليه ....

فلسطينية الهوى said...

مجهول :


نسأل الله الهداية

اللهم آمين


_________________


نور :


يمكن أنتي مش متخيلة الكلام


بس الاسلام وضع حد قذف العرض الجلد

مجبتش حاجة من عندي


احيانا للاسف بنتحدث في الاعراض واحنا مش عارفين


__________________

محمد السيد :


أهلا بيك في المدونة


وسعدت جدا بتعليقك ومعاك حق في كل كلمة قلتها


ربنا يكرمك يارب

____________________

ميت :

حصل خير .... ربنا يغفر للجميع

_____________

شقلبان :

اهلا بمشرفنا في المدونة

يارب تكون زائر دائم


هطلع عالرابط ان شاء الله

وفعلا المواقف دي بتكشف لنا عن جوانب في شخصياتنا كنا نجهلها

ربنا يعين


____________


المجاهدة :

حصل المسلسل المتكرر ليس الا


_____________

النجار :


الاسلام أباح الدعاء على الظالم

فليه لما ندعي يبقى عدم اتزان ؟؟


أنا ده مش طبعي أبدا وعمري ما دعيت على مسلم


بس لما يكون الظلم كبير يبقى حقي أني أدعي

_______________

ريم :


وحشاني انتي كمان


____________


رحاب :


يارب يحصل خير دايما


________________

أخ اعلام :

اهلا بيك في المدونة

قرأتهم كلهم :)

_________________

واحد مش مع حد :

الانسان يعتبر أن ده عيب فيه

لما المقربين والمحيطين يدلوه

ولما يكرر الفعل


اما الافتراء من غير دليل

مش شايفه اني اعيد النظر في حاجة معملتهاش ولا ايه ؟؟


___________________


منى :


جزيتم خيرا للنصيحة


وعلى حكاية الدعاء :

اللي ايده في المية مش زي اللي ايده في النار

______________


اخوانية مصرية :


نورتي المدونة


ربنا يكرمك على كلامك بجد

كأنه بلسم لجرح دام


ربنا يكرمك يارب


_______________


مجهول :


أعتقد أنك لو كنت تمتلك الشجاعه

كنت سجلت بعضويتك وأفصحت عن نفسك


بدل القاء كلام لا يصح

والهروب


ربنا يهدي الجميع


هنا مدونة نظيفة يمنع فيها التطاول

Anonymous said...

أزيك يا أيه .....ومن غير ما تزعلى نفسك أوى ..أنتى مش مسئوله عن قصور فى فهم بعض الناس......اللى بياخدوا معانى لكلامك غلط دون أى حسن نية وبدل ما نقول ربنا ياخدهم نقول ربنا يهديهم ....ونطلع احنا أحسن ولا إيه ...وبالنسبة للشاب اللى بيقولك التربية أهم من التعليم ...أكيد هو مش عارف معنى كلمة تربية كويس ...لأنه لويعرف معناها...مكانش رد عليكى بالأسلوب السئ ده .........واللى بيدل على تربيته هو ......
والأفضل ليه انه يتعلم ويتربى فى بيئة صحة ...بعيد عن البيئة اللى بتعلمه يغلط فى بنت زى أخته ..يلا ما علينا هيا الدنيا كده .......
شكرا ليكى..... وربنا يوفقك إلى الأمام دائما وللخير طول العمر