Wednesday, September 12, 2007

رمضان .... وحاجات تانية



رمضان بكرة





قاعدة لوحدي



كلمت شخصية بقالي سنة مكلمتهاش



هطلع يوم الجمعه عالتلفزيون

كلها حاجات عايزة اكتب عنها



_________________



سعيدة جدا أن رمضان بكرة



وحشني المسجد



وحشني الاعتكاف



وحشني الرسول جدا



ورمضان أكتر حاجة بتخليني أحس أني قريبه منه



فرحانة جدا أني أخيرا هصوم رمضان وهصلي تراويح



________________________





وعندي حزن فظيع



حاجات كتير جوايا



ومشاعر كتير ملخبطة



قاعدة أفكر



ليه بنلبس أقنعة كتير في حياتنا



كان نفسي من شوية أصرخ بصوت عالي



واعبر عن مشاعري بحرية .. من غير قناع التهذيب



حاجة وحيدة اللي خلتني اكلم الشخصية دي



قلت مدخلش رمضان وانا شايله من حد



عشان ربنا يغفرلي



عشان أدعي واقول يارب سامحتهم وكان صعب جدا



بس عشانك يارب



وعشان تغفر لي



قعدت أسمع كلام مش مقتنعة بكلمة فيه



كلام عن الخطأ الشنيع والعقاب



وانا داخليا مقتنعه أنه ببساطة درس كنا لازم ناخده عاجلا أم آجلا



ولو مش مع نفس الشخصية



كانت هتبقى مع حد تاني



بزعل اوي لما أحس أننا بنحط حدود واسوار كتير ملهاش اي لازمة



ايه المشكلة لو قعدنا على ترابيزة واحدة وحلينا مشاكلنا



وعرضنا كل الحقائق قدامنا وطلعنا بهدنة وحل جذري



بس لا .. لازم نلبس قناع ونعمل نفسنا لا مبالين



وكأن المشكلة لم تجرحنا في الصميم



بس لازم نبعد .. وكبرياءنا وكرامتنا تكون اغلى حاجة عننا



ونقفل صفحة من حياتنا و نحط نهاية احنا مش مقتنعين بيها



بس مجبرين نقبلها لأن مفيش غيرها
__________________
تالت رمضان أقضيه لوحدي
كنت متخيلة ان الزمن والتجربة المكررة
هيخلوني أتعود
ومحسش بألم
بس للاسف كل مرة يكون الشعور صعب
ويمكن أشد ألم من المرة اللي قبلها
بس بعزي نفسي :
عزاؤنا أننا في الله غربتنا
من أجل عزة إسلام وإيمان
______________
كل سنة وانتم طيبين :)
وابقوا تابعوني على برنامج ( بداية ) على مودرن

11 comments:

AbdElRaHmaN Ayyash said...

:)
مين قال ان حاجه زي كده ممكن الانسان يتعود عليها
؟
جميل جدا انك تشيلي اي حاجه في قلبك ناحية اي حد
وربنا يتقبل منك يارب
اخر حاجه :)
هو ايه برنامج بداية ؟؟؟
و امتى و ازاي يعني
و تردد القناةو الحاجات دي

فلسطينية الهوى said...

البرنامج على قناة مودرن

تردد القناة :

10758

VER

عالنايل سات

من الساعه 10 ل 11 يوميا

بهاء said...

ان شاء الله ربنا يتقبل منك
وبداية مميزة لرمضان انك تسامحي وتشيلي من قلبك
يا ريت نكون زيك
البرنامج 10 مساء ولا صباحا؟؟
كل عام وانتي بألف خير

mohamed said...

كل عام وأنتي بخير يا اٌية

ربنا يصبروك ويرزقك الثبات ويجعله في ميزان حسناتك

محمد شاكر said...

نحن على إنتظار ...بس عاوزين نعرف البرنامج عن ايه وبيتكلم عن ايه وانتي حتتكلمي عن ايه ولمدة قد إيه....لا مؤاخذه لو فيها
تطفل أو فضول
وبلاش الحزن ده وبلاش القناع الاسود ...يعني ...يمكن ...جايز....لما الانسان بيحاول يتعود
على حاجه لازم حيألفها مهما كانت صعبه ....وادعي ربنا وقولي يا رب حتلاقي لكل عقده حلال ولكل مشكله مفتاح للفرج ....وبلاش القناع
أنا عارف انك مش حتفهمي حاجه من كلامي لأني انا ذات نفسي مش فاهم نفسي ...ما علينا
وأما نشوف الحاره سد ولا لأ

barbie girl said...

كل سنة وانتى طيبة

رمضان كريم

ازاى تحسى بغربة وانتى مع ربنا ومع التراويح والقران؟؟؟

كلنا اخواتك يا بنتى..ان شاء الله هتفرج على البرنامج

فلسطينية الهوى said...

بهاء :

وحضرتك بصحة وسلامة

البرنامج الساعه 10 بليل

ويارب كلنا نسامح بعض
_________________

محمد :

وانت بطاعة وقرب إلى الله

وربنا يثبتنا جميعا اللهم آمين

_____________________

محمد شاكر :

البرنامج عن أخلاقيات الرسول

وانا طلعت خلاص ... لو هطلع تاني هبقى اكتب الميعاد عالمدونة


ومش فاهمة تقصد ايه بالقناع الأسود ؟؟

وقصة أن الانسان بيألف الامور الصعبة

اه ممكن يألفها ويتأقلم معاها

بس عمره ما يألف الألم

__________________

رحاب :

وأنتي طيبة وبخير


الانسان في الدنيا غريب

مهما ثبت جذوره يظل غريب

القرآن والدعاء والصلاة

بتخفف الغربة وبتفكرنا بسبب وجودنا


تابعي وقوليلي رأيك

الـفجـريـــة said...

اولا ازيك يا اية

جيت هنا قبل كده بس اول مرة اعلق

كل سنة وانت طيبة وربنا يباركلك فى رمضان ويتقبل دعائك

شعور الغربة ده صعب
بس الاصعب منه شعور الوحدة
يعنى اذا كنت غريبة فحاولى تتكيفى وتتواصلى مع من غبت عنهم باى شكل حتى لو بسيط دون الشعور بالوحدة

وان شاء الله اشوف البرنامج
بس اللى احلى من اى حاجة
انك وعلى الرغم ان ده ممكن يكون كان صعب عليكى
خلصتى كل اللى كان جواكى تجاه اى حد قبل رمضان
سلاام

noha said...

كل سنة وانت طيبة يا يويويتى

:)

وان شاء الله تشوفنى قريب

ربنا يخلينى لك

:P

Anonymous said...

بسم الله الرحمن الرحيم

بداية ....كل سنة وانتي طيبة وبالف خير
وكل سنة وانتي لله اقرب واحب

وتاني حاجة ...عايزة ابركلك على برنامج " بداية " مع اني ما شفتهوش بس هحاول ان شاء الله ابقى اتابعه ...وربنا يجعله بداية خير ونجاح ليكي

اما تالت حاجة ...عايزة اقولك جمله يمكن تريحك ولو بشكل بسيط بس ان شاء الله هتترك اثر في نفسك ...واعتقد انك ممكن تكوني سمعتيها قبل كده او حد قبلي قالهالك ...بس عايزة اقولهالك اوي يا ايه ...

(( من وجد الله فمن فقد ..ومن فقد الله فمن وجد ))

وان شاء الله ربنا يجمعك باهلك واحبابك على خير دايما ويكرمك ويعزك

فلسطينية الهوى said...

أسماء :

منورة المدونة

وسعيدة انك قررتي اخيرا تعلقي

اما اني بدأت رمضان وانا مش شايلة من حد

فاتكسفت من ربنا اقوله سامحني

وانا مسامحتش الناس

ازاي اطلب منه يسامحني وانا غلطي فظيع

والناس اللي غلطت فيا بشكل لايقارن مع خطأي في حق ربنا مش مسامحاهم


________________

نهى :

مستنياكي على أحر من الجمر


___________________

مجهولة :


منورة المدونة

وربنا يكرمك عالجملة يارب


( من وجد الله فماذا فقد )