Sunday, November 25, 2007

تاج لو

تاج اتبعت لي من الآنسة : ولاء
ولانها اتحايلت عليا اني مش أحرجها وأجاوب عليه
اديني هجاوب
لومكنتش مصري بس عربي كانت هتبقى إيه نظرتك للمصريين واللي بيحصل في مصر دلوقتي؟
انهم شعب سلبي مستكين .. يرضى بالظلم في انتظار ان يتنزل شخص ما من السماء ليطالب بحقوقه

غير أن سلبيته بتأثر على كل الشعوب اللي حواليه
لانه لو فاق الكل هيفوق
وأكيد كنت هبقى فرحانة أوي إني مش مصرية ولله الحمد
لو كنت أوروبي أو غير مسلم بردو إيه نظرتك للعرب والمسلمين؟
لو كنت أوربي مسلم كنت هحمد ربنا أني عرفت الاسلام كدين رباني من القرآن أو غيره
وليس من خلال المسلمين
لو كنت غير مسلم وفي الوضع الحالي للمسلمين
كنت هنظر لهم كإرهابيين بربر متخلفين عن الحضارة الحالية بأشواط كثيرة
لو قالولك إنت بقيت رئيس جمهورية هتعمل إيه؟
هوقع قرار استقالتي
بس قبلها هطلع قرار بتعيني في أي حاجة عسكرية او تبع الجيش
وزيرة حربية تنفع



لو كان ينفع ترجع طفل تاني وتخليك طفل علطول هترجع ؟ و ليه ؟
لا مكنتش هرجع
لاني مكنتش هبقى مسئولة عن حياتي وقرارتي
غير اني مكنتش هعرف أقدم أي إنجاز يذكر
وكنت هرجع بعيدة اوي عن هدفي
لو إنت طبيب وعندك مريض ميؤوس من حالته أيهما تفضل إنك تصارحه بالوضع وتقوله كل شيء بأمر الله في الاخر ولا تغرس فيه الامل للغاية لما يموت؟
طبعا كنت هقوله
الموضوع مش هزار عشان نفضل مخبيين عليه لحد ما يموت
هقوله عشان يستغل آخر أيامه صح
يودع أحبائه

يسامح الناس ويطلب غفرانهم لاخطائه
يراجع حياته ويتقرب إلى الله
بس هنصحه نصيحة صغيرة
أنه قبل ما يموت يعمل حاجة كان نفسه يحققها طول حياته
يسافر ... يتفسح .. يعمل أي حاجة كان نفسه فيها
يستغل كل لحظة في حياته المتبقية
ميضيعيش لحظة
لو سمح لك برؤية الرسول عليه الصلاة والسلام وإنك تقوله كلمة واحدة بس أو جملة واحدة بس هتكون إيه؟
وحشتني .. أنت فخور بينا ؟؟ ولا خذلناك



لو خطبت واحدة أو اتخطبتي لواحد وأثناء الخطبة اكتشفت أو اكتشفتي إن الطرف الآخرغير قادر على الإنجاب هيكون تصرفك إيه؟


امممممممممم
أظن أنه على حسب خطة كل واحد ورؤيته لمستقبله
يعني لو افترضنا أنها أمنية حياتها أو أمنية حياته يعملوا عملية استشهادية
يبقى أصلا هيحطوا عيالهم فين بعد الشهادة ؟؟!!
بس أكيد موقف صعب هبقى أفكر فيه ساعتها




لو طلعت القمرهتكتب إيه عليه؟
بحبه يا بابا بحبه :D


أظن أني هكتب شهادة التوحيد:
لا إله إلا الله .. محمد رسول الله
لو كنا في عصر ازدهار الأندلس كنت تتخيل نفسك إزاي؟
عالمة بتخترع حاجات .. وطبيبة وأديبة

واسمي يسطر في التاريخ بقى
لو أنا مررت التاج ده لحد وما جاوبش عليه أعمل فيه إيه؟
ولا حاجة
لو قالولك نفسك تشوف مين دلوقتي ؟؟
أسرتي
لو قالولك مشتاق لفين ؟؟
للأقصى
___________________________
أمرر التاج ل

9 comments:

وضـّاح said...

ما شاء الله

إجابات جميلة

ولكن نظرتك للمسلمين صعبة

ربنا يجمع عليك أهلك

:)

عبدالرحمن ياسين said...

إجابات جميلة...
بس ليه تنظري للمسلمين كأنهم إرهاب
...
شكرا
دمتم
سلام

أمــ الله ــة said...

أول زيارة لى فى مدونتك


أشعر أنك فتاة رقيقة تلقائية مليئة بالحيوية

بارك الله فيكِ

تقبلينى أختاً لكِ

أمــ الله ــة

shahed 7ak said...

اجابات رائعه

انا اول مره ادخل هنا

بس المدونه شكلها جامد

اوعدك ان اقرأها ان شاء الله

فلسطينية الهوى said...

وضاح :

ربنا يكرمك يارب

بس هي مش نظرة صعبة و لا حاجة

يعني دلوقتي انت مثلا امريكي غير مسلم

قالوا لك ان تنظيم القاعده المسلم


كان سبب في قتل الالاف من شعبك واهلك

وجايبينهم قاعدين في الجبال بعيدا عن الحضارة باشواط هتبقى نظرتك ايه ؟؟

___________________


عبد الرحمن :


ربنا يكرمك وجاوبت على سؤالك خلاص

_____________________

أمة الله :

منورة المدونة

ويارب تكون زيارتك دائمة


وربنا يكرمك على الاطراء الذي لا نستحقه

لو اختلطتي بيا هتعرفي اني مش رقيقة خالص :D

و يسعدني ويشرفني اكون اختك

____________________

شاهد حق :

أهلا بيك في المدونة


ومنتظرين رأيك في بقيتها

جزيتم خيرا

just-amuslim said...

بجد

انا

وانت

واحد

يا حبيبتي

محمد الفاتح said...

بارك الله فيك
إجاباتك جميلة جدا
بس أنت ليه هتقدمي إستقالتك من رئاسة الجمهورية
دا إنت باين عليكي ما شاء الله شخصيتك قوية وتمتلكي سداد رأي وقوة ذهنية عالية دا إحنا نتشرف إنك تبقى رئيسة جمهوريتنا وأنا بصراحة معجب بمواضيعك الجديدة والقديمة

فلسطينية الهوى said...

ولاء :


منورة يا شيخة

متحاوليش انا زعلانة منك

_________________________

محمد الفاتح :


اهلا بيك في المدونة ..منور يا فندم


بس بصراحة مقدرش اكون رئيسة جمهورية


كنت اتهبل بصراحة


آخري حاجة عسكرية

لاني نفسي اوي ادخل الجيش


والشرف ليا يا فندم

بس لو بقيت رئيسة انت اول واحد هيعمل عليا ثورة وانقلاب :D

محمد الفاتح said...

جزاكم الله خيرا على الرد بس إنت بس إبقي رئيسة جمهوريه وإن شاء الله مش هكون أول واحد يعمل عليكي إنقلاب ممكن أبقى تاني واحد
والسلام عليكم