Sunday, December 23, 2007

شوية مذكرات

السلام عليكم
انا ناوية إن شاء الله أكتب عن تجربتي في السكن في مصر لوحدي
بمعنى أصح الاغتراب والدراسة
والاستفادة اللي انا استفدتها من التجربة دي
رغم صعوبتها إلا أنها بجد مفيدة جدا على معظم الاصعدة
أول استفادة :
الاعتماد على النفس ... أو مبدأ : ربنا ميحوجنيش لحد
معنى رائع جدا ومريح جدا

انك متحتاجش لمخلوق في الدنيا غير ربنا

ويوم ما تحتاج لحد تبقى على آخرك ومخنوق ومتضايق

بحب جدا أني أخلص كل حاجاتي بنفسي من غير مااطلب من مخلوق حاجة

افتكر اني في شهر 9 كنت بنقل لبيت جديد

وبنت قالت لي يومها وأنا بلم حاجاتي : انتي عاملة زي الراجل كده .. فين الانوثة اللي عندك

قلت لها طيب أنا هوريكي أنا راجل ازاي

كانوا خمس شنط سفر كبيرة

وكمبيوتر

وكتب ومجلدات كتيرة جدا

غير حاجات المطبخ

نقلتهم مشي من السكن القديم للجديد وطلعتهم للدور الخامس

ومرضتش أطلب من حد يشيلهم

اي نعم اتكسحت بمعنى الكلمة

بس كان شعور رائع بعد ما خلصت نقل ورتبت البيت وماحتاجتش لحد

بحس بالانجاز واني حققت حاجة

طبعا كل حاجة في حياتي أنا مجبرة أني أعملها عشان محدش تاني هيعملها لي

بس خلاص بقى مبدأ عندي ان حتى لو حد يقدر يخلص لي اموري

مطلبش منه

ويوم مااطلب وحد يرفض

بيبقى شعوري فظيع

ممكن أقضيها عياط بالساعات

لاني اضطريت اني اطلب وقللت من كرامتي بالطلب ده

والشخص رفضه

المشكلة ان الموضوع ده بيزعل ناس مني أحيانا

اني برفض اطلب من حد حاجة

يعني حتى لو تعبانة وبموت مش هطلب منهم

فبياخدوها اهانة ليهم

ومبعرفش اوصل لهم ان ده بقى مبدأ عندي

مش بعتمد على حد غير نفسي

ومش بطلب من حد حاجة

دي الاستفادة الاولى

هبقى اكمل الباقي بعدين

10 comments:

خالد - كلام من القلب said...

على فكرة عجبتنى كتير التدوينة دي

واحيي حضرتك على شجاعتك وحرصك على طلب العلم

ولكن انا شايف ان حضرتك مش تحتاجي لحد وتعملى كل حاجة بنفسك
ده شئ غلط جداً


امال ازاى فى صحوبية واخوات فى الله

لازم كانوا اخوات حضرتك يساعدوكى وحقك عليهم كده



يا يت حضرتك تغيرى نظرتك فى موضوع المساعدة من الغير ده
.......................
ولكن انا لما عملت موقف شبيه بده
اخوانى مش عايز اقول عملوا اية . معايا

وكل سنة وحضرتك بخير

وضـّاح said...

معاكي إن المفروض إن الإنسان يعتمد على نفسه قبل أي إنسان آخر فكما قالوا : لا يحك جلدك مثل ظفرك

وقبل هذا يتوكل على الله

ولكن الله سبحانه وتعالى فرض على الناس استخدامهم بعضهم البعض سواء بأجرة أو بدون فوالديك لم يخدماك ويرعياك لأنك تدفعي لهم .. كذلك أخواتك

عمر محمود said...

ربنا يحفظك ويبارك وقتك

3abdallah 7osni said...

ربنا يبارك فى حضرتك

ويكون عونا لكم باذن الله


بس برده انا اعلق على نقطة

الاعتماد على النفس ... أو مبدأ : "ربنا ميحوجنيش لحد
معنى رائع جدا ومريح جدا انك متحتاجش لمخلوق في الدنيا

يعنى هو احيانا مريح فعلا لكن لا يستطيع الكرسي ان يقف على رجل واحدة

Wish I were a Butterfly ... said...

سلام عليكم

حبيبتي.... ومش هعرف أقول كلمة غيرها لأنك وحشتيني أوي، غير اني مستغربة لأقصى الحدود اني لقيت تعليق منك النهاردة .. "و النهاردة بالذات"!!! لأني كنت بفكر فيكي النهاردة الصبح و كنت ناوية أول فرصة أدخل البلوج اتطمن عليكي من بلوجك وبعد كدة اتصل

بس بجد فاجئتيني جداااا
سبحان الله بجد.. أنا لحد اللحظة دي مش مصدقة لأني فكرت فيكي كتير أوي النهاردة يا يوية

عموما... عجبني اوي انك تقوليلنا اللي استفدتيه من تجربة مرت في حياتك. جزاكم الله خيرا بجد

وعندك حق... الناس بتتضايق جدا لو قلتي انك مش عايزة مساعدة وبيعتبروها اهانة كبيرة. مش عارفة ليه بصراحة!! بس في نفس الوقت مش حساه صح أوي في كل الأوقات اننا مش نعتمد على أي حد في الدنيا كلها، ساعات بنكون محتاجين ناس جنبنا ضروري... و أيوة هيكون الاعتماد على ربنا وبس، بس دة لا يمنع ان يكون فيه حد يساعدني و يفهمني ويكون فيه كتف أعيط عليه لما أحتاج

ربنا يعزك دايما يا آية. سلام ياجميلة

الفقير إلى الله said...

فعلا الغربه بتعلم حاجات كتير ورائع الاعتماد على النفس لكن لا ضير ان يكون البعض بجانبنا يعاوننا ويأخذ بايدينا

فلسطينية الهوى said...

خالد :

وحضرتك بصحة وسلامة

سعيدة انها عجبتك

وفي موضوع المساعدة من الغير

في حاجات الانسان يقدر يخلصها بنفسه فمفيش داعي يطلبها من الاخرين

وبعدين هي شنطي وحاجاتي اطلب من التانيين يشيلوها ليه ؟؟


صاحب الحاجة اولى بحملها

_____________________

وضاح :

اكيد طبعا عائلتي ساعدتني وخدمتني من غير طلب

بس ده اصلا معنى العائلة

ومش لازم بقية الناس يبقوا زي العائلة

اكيد في امور صغيرة بنطلبها من الناس المقربين مننا

وده طبيعي جدا في الحياة

_______________

عمر محمود :

شرفت المدونة يا فندم

وربنا يكرمك ويبارك فيك

_________________

عبد الله حسني :

شرفت المدونة بزيارتك ويارب تستمر فيها

واكيد طبعا مش كل امور حياتنا هنقدر نعملها بمفردنا

انا بتكلم عن الامور اللي نقدر نعملها لوحدنا

__________________________

هبة :

وحشاني يا بنوتة والله فعشان كده دخلت عندك البلوج وعلقت

أني أحبك في الله بجد

واكيد احنا احيانا بنحتاج الناس

بس عارفة شعورك انك ممكن تحتاجي حد ومش تلاقيه شعور وحش جدا

فعشان كده ماما كانت بتقولي :

مش تنتظري من الناس حاجة عشان لو معملوهاش متتضايقيش

ولو عملوها تبقي سعيدة

_________________

الفقير الى الله :

شرفت المدونة


الغربة كلها دروس والله

سواء كانت مؤلمة او سعيدة

بس كلها دروس فعلا

الله المستعان

CresceNet said...

Gostei muito desse post e seu blog é muito interessante, vou passar por aqui sempre =) Depois dá uma passada lá no meu site, que é sobre o CresceNet, espero que goste. O endereço dele é http://www.provedorcrescenet.com . Um abraço.

just-amuslim said...

كعادتك هي

كفاك فخرا ان تطبقي ما قاله علي بن ابي طالب كرم الله وجهه
صاحب الشئ اولى بحمله

اعانك الله

وزادك مما تمنيت واكثر
تحياتي

فلسطينية الهوى said...

ولاء :

فكرتيني بأيام الحج والشنطة بتاعتي والخناقات

ياااه كانت أيام


انا مش حاسة انها عادة وحشة حاسة أنها عادة ايجابية


ربنا يكرمك لكلامك يا أخيتي