Wednesday, April 30, 2008

مستشفى الطوارئ

السبت ... الساعه الواحدة ليلا
مغص فظيع وشوية حاجات مصاحبة ليه قررت اروح بسببه الطوارئ
كالعادة بقى قمت انا وسمر لبسنا العبابات السودا .. وسمر ياعيني لبست هدومها مش مكوية
ونفسها طبعا تقتلني على مواعيدي الجميلة
لبسنا وخرجنا الصالة لاقيت كل اللي معايا في السكن رافضين انزل انا وسمر بس
فزميلتنا التالتة نزلت معانا ووالدتها
رحنا مستشفى ابن سينا في الدقي
جابوا لنا دكتور باطنة معاه ماجستير وبيحضر الدكتوراه
سمعت له الحالة المرضية والتاريخ كله
وقلت له دي نزلة معوية لاني بدأت أسخن
وقيء شديد مش بيقف ... وده مش ألم قولون عصبي
بس هو قرر انه قولون عصبي واداني بسببه 3 ابر
زنتاك وبوسكبان وكورتاجين
استنى المغص يقف او القيء ولا فرقت معاهم
الساعه 3 ليلا
حرارتي مرتفعة جدا ... وحسيت اني بودع بقى وهكتب الوصية
قررنا ننزل تاني
اتصلت بعمتي صحيتها من النوم
جت اخدتني مستشفى رابعة العدوية قسم الطوارئ
قلت للدكتور اول ما شفته متحاولش تقولي ده قولون عصبي
اه انا متضايقة وكله بس ده مش قولون عصبي دي نزلة معوية
الدكتور لقى ضغطي عالي وحرارتي عالية فصدق وقالي مش هقول كده
ركب لي محاليل
وقلت له يديني منوم عشان عايزة انام
الحمد لله عملوا نتيجة .. خرجت من المستشفى 7 صباحا
روحت السكن 6 مساء
تاني يوم الساعه 12 ظهرا ... الحالة سيئة مرة تانية
وبدأت أدخل في جفاف
اتصلت بيمون ( يمنى ) سابقا
ونزلنا مستشفى الكاتب اللي جمبنا في الدقي طلع مفيش هناك طوارئ
رحت الشبراويشي دخلت الطوارئ قلت لهم بدخل في جفاف ومش عارف ايه
قالت لي ادفعي الكشف ... دفعت 60 جنيه على اساس ادخل بقى لدكتور الباطنة
لاقيت طابور قبلي واستني الطابور
اخدت فلوسي وخرجت
رحت مستشفى العجوزة ... فين التذكرة يااستاذة
البواب مش راضي يدخلني يقولي ايه اللي ضمنك انك عندك نزلة معوية
حاجة غريبة كده
المهم فضلنا نلف جوا المستشفى دي
وندفع هناك ونقطع تذكرة من هنا
ودخلت اخيرا للدكتور بعد مااخترقت الطابور اللي واقف
الدكتور قالي معنديش حاجة
مش عارفة ازاي
خرجت من هناك رحت معهد ناصر
ده كله وانا في جفاف ومش فالدنيا اصلا ومش قادرة اقف ولا اتكلم
رحت هناك دكتور الباطنة قالي لازم اعمل تحاليل
نزلت اعملهم وطول ماانا ماشية الدكتورة بتهيألي اني عندي كبد وبائي
وتقولي عالعلاج ومش عارف ايه
وانا طبعا مزبهلة
وبعدين اخيرا قرروا يركبوا محاليل
ودي قصة تانية
اصل عروقنا لعبة في ايديهم
تدخل الابره وتطلعها وتحركها جوه عادي جدا
وازاي حاسة بالم انتي طفلة
لا حضرتك اللي بتجربي براحتك
الحمد لله طلع التحليل سليم
وخرجت من المستشفى على خير
طبعا لا يسعني في هذا الموقف سوا أن أشكر
سمر ويمنى
شكر خاص جدا من اعماق اعماق قلبي
عشان شاركوني التجربة دي
بالاضافة لكل اللي زارني :
اماني وهويدا ومروة
ربنا يكرمكم .. ادخلتم السرور على قلبي
وكل زمايلي اللي كلموني يطمنوا عليا او يجيبوا لي عنوان دكتور او مستشفى
جزاكم الله خيرا كثيرا

10 comments:

Anonymous said...

بجد الف سلامه عليك..

لابأس طهورا ان شاء الله
كله بأجره ياحبيبتي..


يارب تقوملنا بالسلامه من جديد

بجد قلقتيني عليك جداااااااا


سميه

Anonymous said...

شفاك الله و عفاك يا اية و تكفير ذنوب ان اشاء الله ..بس واضح ان ذنوبك كتيييييييرة اوى:)


يمنى المهدى

محمد شاكر said...

لا حول ولا قوة الا بالله شفاكي الله وعافاكي ..ان شاء الله كفاره للذنوب
يا رب تفضلي بصحه وعافية دائما..وان يرفع الغمه ويثبتك عند البلاء

just-amuslim said...

الف سلامة عليك يا يوية بجد

ربنا يكرم سمر ويمنى


طمنينا عليك

Nesreen said...

الف الف سلامه عليكي يايويو
انا زعلانه منك لانك مش قلتي ليا لما اتصلت بيك
بجد زعلانه
انا عارفه اني مقصره عليك بس كنت قلتي ان صوتك كدا عشان انتي تعبانه

أبو أسامة said...

هو المفروض نقول : ألف سلامة
نسأل الله العظيم رب العرش العظيم أن يشفيك
لكن بما أنك قررت دخول المستشفيات المصرية ( سواء الحكومية أو الخاصة ) فيكون من الواقعية أن نقول :
البقاء لله
وإنا لله وإنا إليه راجعون

فلسطينية الهوى said...

الله يسلمكم جميعا يارب

سمية ويمنى وولاء ومحمد

ويانسرين ياحبي :

محبتش أقلقك من غير داعي

ربنا يكرمك يارب

وأبو أسامة :

أهلا بيك في المدونة

Anonymous said...

الحمد لله على سلامتك

اذا احب الله عبدا إبتلاه

فمبارك الابتلاء وان شاء الله تكوني نجحتي بقى

ده اكيد طبعا

تحياتي
الاء

كفايـة طيبـة said...

الف سلامة عليكي ياقمر ...

يارب الناس الوحشة هي اللى يجيلها مغص وانتى لا يابنتى

يارب تكونى كويسة دلوقتى :)

Anonymous said...

الف سلامة يا ايه ان شالله في اللي بيكرهوكي خدي بالك ن نفسك وصحتك اهم حاجه


محمود عبد المجيد