Monday, May 26, 2008

محترفة نكد


مؤخرا أكتر من حد قالي اني بقيت نكدية

ومحترفة نكد حسب تعبير أحدهم

وان مدونتي بقت كلها مواضيع عن الاكتئاب والخنقة

زعلتني الجملة دي جدا بعدين فكرت فيها بمنطقية

طبيعي ان الانسان في حياته يتقلب بين الحزن والفرح

ولان الدنيا دار شقاء فطبيعي الشقاء حصته أكبر

أكيد في ناس كتير عندها مشاكل اكبر من اللي عندنا

ناس محرومين من أبسط مقومات الحياة

ناس وحيدين في العالم

ناس مسلوبة حريتهم

واحنا مدركين لده كله

بس في لحظات حزننا

لما يكون أشخاص عزيزين علينا اوي بيصارعوا المرض الشديد ويا عالم مين اللي هينتصر في الاخر

احباء لينا ودعناهم وذكراهم مجسدة أمام أعيننا .. بنشوف أهلهم دامعين ولا نملك الا مشاركتهم الدموع

بنهون عليهم ان في ناس أشد ابتلاء

بس ده لا ينكر شعور الالم اللي جوانا وجواهم وده حقنا

لما بنشوف الظلم بنتألم

ومستحيل يخفف علينا ادراكنا اننا في عالم لايرحم

الظلم فيه عادة

حاجات كتير اوي بتنكد علينا عيشتنا

ذكرى النكبة ... واقع المسلمين في العالم ... أهلنا في غزة ... أهالينا المعتقلين

فطبيعي في فترة نحزن ... ممكن الفترة تطول أو تقصر

وحقنا اننا نعيش حزننا مهما طال أو قصر لان ده شعور طبيعي

زيه زي السعادة

ممكن نقسم اننا مش هنبتسم لحد ما الحال يتغير ومحدش يقدر يعترض

وممكن نتحايل على الألم ده ونسرق لحظات سعادة من حياتنا

وده كله حقنا المشروع

بس مش من حقنا أننا نشكو الالم والحزن لغيرنا

لا تشكو للناس جرح انت صاحبه ... لا يؤلم الجرح الا من به ألم

فأنا أخدت قرار اني مهما اتضايقت

مش هحكي لاي حد

غير اللي انا واثقة انه هيخرجني من الحالة دي ويتفهمني ومش هيحس اني نكدية


هحكي لماما بس واخواتي

وربنا يساعدني في القرار ده

وأقدر أنفذه


Sunday, May 25, 2008

قفيان عزيزة عليا

أعز 3 عندي في قسم صحافة
من اليمين : ياسمين
ثم منة
ثم بسمة
بعزكم مووت وانتظروا البوست القريب عنكم


من اليمين : سمر

صاحبتي اللي في حاسبات عنيها تعبانة على فكرة

فبتمنى لها الشفاء العاجل

وشكلها بعد الصورة دي هتفك الشركة اللي ما بينا

ثم يمنى

أكتر واحدة بحبها في اذاعة وتلفزيون

الشريرة دائما وأبدا

محدش يغره مظهر الهدوء اللي باين عليها

لانه الهدوء الذي يسبق العاصفة

في جملة كده مينفعش نجيب سيرة يمنى من غير ما نجيبها

كل لما اقولها انتي بقيتي شريرة

تقولي بقيت

انا اصلا شريرة .. وهندخل جهنم سوا

Saturday, May 17, 2008

تفاريح


بما أن دي مدونتي


يعني مسموح لي أكتب كل حاجة فيها ومحدش يقدر يعترض


فأنا هكتب شوية حاجات كده خنقاني من البشر اللي عالكرة الارضية


لو حد انا كنت بقدرها جدا وبحبها جدا في الاخر طلعت قليلة الذوق معايا ويعني عملت فيا حاجات مش كويسة


مش يحق لي أبقى شريرة واشربها من نفس الكاس


يعني ليه أول ما تيجي تعتذر أفتح صفحة جديدة وأقبل اعتذارها


ليه مش أعمل فيها نفس المواقف


عشان تحس نفس الاحساس بعدين أسامحها


ليه أبقى طيبة وأخلاقي كويسة


ليه مش أعاملها بالمثل


أذا عاقبتم فعاقبوا بمثل ما عوقبتم به


ليه المفروض أبتسم في وجه الناس اللي أنا مش طايقاهم


وأسلم عليهم واسمع الفشر بتاعهم


وازيك يا حبيبتي وعاملة ايه


يعني ايه المانع أكون قليلة الذوق


ومرضاش أسلم عليهم وأقولهم : يا منافقين لا حبيبتكم ولا بتاع كلكم شوية كدابين


ايه المانع يعني



هل أكون شريرة لو رحت انتقمت من شخصية أذتني من سنتين وضربتها بالقلم مثلا


علما بأني نفسي أصلا أعلقها من رجليها واحط تحت راسها نار ... لحد ما مخها الشرير يسيح


فلو ضربتها هيبقى أخف


الضرب مش حرام في حق الناس الوحشين


هكون قليلة الذوق لو البنت اللي بتستلمني كل شوية عالميل


آية أنا مكتئبة


آية أنا وحيدة


آية خطيبي زعلني


ماما شخطت فيا


آية بحبك ومش بتحبيني


أروح عامله لها بلوك وأقولها أني مش طايقاها ولا طايقة اكتئابها


ذنبي ايه أفضل اسمع في اكتئاب واحدة قابلتها مرة في حياتي


وكانت أكبر غلطة أني اديها ميلي


يعني ليه مش أريح مخي وأكون قليلة الذوق


أو أزعق لأي حد حاسس بالوحدة والغربة والكلام الكبير ده


وهو قاعد وسط أهله منعم مكرم


يعني أقولهم بصوا على أبناء المعتقلين والمغتربين


وأضربهم على غبائهم



أنا اتخنقت من النيك نيمات اللي عالماسنجر


هولع في أي حد يحط انه مكتئب ... او اختناق وانتحار وتمزق ومش عارف ايه


مش طالباهم يعني



ممكن نيك نيم مكتئب بس مش متشائم يجيب للخلق اللي حواليه اكتئاب


مش عايزة أكلم حد ويبعت لي ندج


عشان بكره الندجات جدا


زهقت من كمية النفاق والكدب اللي عند الخلق


قرفت من البنات اللي بتستخدم الشامبو بتاعي من غير اذن


وتاكل أكلي وتشرب عصيري


وبعدين تكدب وتقولي معرفش مين


عايزة اولع في الناس الظريفة


اللي أول ماتشوفني


تقولي ايه ده انتي رفيعه مش ناوية تتخني


لا جبتي التايهة .. عقلية ماشاء الله


لو عايزة أتخن كنت تخنت من زمان


نفسي أبقى أرد اقولها ايه ده مش ناوية تخسي


بجد منتهى الهبل والتدخل فيما لا يعنيها


بيحسسوني انهم فجأة اكتشفوا


مالها النحافة أفضل عشرين مرة من أني أعيش على ريجيم


بعرف اتحرك بسرعة عالاقل


اشمعنا لما نقول لحد انه رفيع يبقى عادي


ولما نقوله يا بدين تبقى قلة ذوق


مانسيب الناس في حالها


كل واحد حر في وزنه


سبحان الله


زهقت من الطيبة واني لازم أكون أحسن من الناس وأعاملهم كويس


لان بجد ناس كتير مش تستحق


كمية ناس الواحد انخدع فيهم وطلعوا وحشين


هيخلوني لو اكتشفت أن حد من اللي بشتغل معاهم او بتعامل معاهم حاليا


لو صدر عنه او عمل حاجة تدل انه وحش


مش هيكفيني قطع راسه بجد




اللي هيتصل بيا بعد البوست ده يقولي مالك


هتهور عليه بجد وهقفل السكة في وجهه


عشان أنا كويسة


بس اتخنقت من البشر


Monday, May 12, 2008

عذرا .. لن أحضر عرسك

كم رغبت أن أشاركك جميع لحظات سعادتك وبكائك

ان أشاركك مهامك في الاستعداد لأن تصبحي عروسا

أن أحضر زفافك ... وأحمل طرحة فستانك وأنت تسيرين إلى عريسك

أن أكون صديقة مخلصة لك

أستمع لآلامك وأمسح دمعاتك

أشاركك ضحكاتك وابتساماتك

لكنك ابتعدت


جلست أنتظر عودتك في مرفأ صداقتنا

وأنتظر ... وأنتظر

لم تلتفتي يوما ولم تعودي

أرسلتي لي مواقف كسرت قلبي .. وحطمت صداقتنا

وفي المرفأ ذاته .. مزقت أوراق ذكرياتنا كلها وغادرته

تأتين الآن تودين لو أننا نعود

كانت فترة جفاء وسنعود

تريدين أن أحضر عرسك فأنا صديقتك

مانفع صديقة أشاركها أفراحها ولا تشاركني أحزاني وأفراحي


عذرا :

لست بصديقتي ... ولن أحضر عرسك

رب ساعدهم علينا


أدع للحكام
بالنصر علينا
يا مواطن
وأشكر الله الذي ألهمهم موهبة القمع
وإبداع الكمائن
قل : إلهي أعطهم مليون عينٍ
اعطهم ألف ذراع
أعطهم موهبة أكبر
في ملء الزنازين وتفريغ الخزائن!
رب ساعدهم علينا
فهم أثنان وعشرون شريفاً مخلصاً
وإننا ياإلهي
مئتا مليون خائن
!
_________
أحمد مطر

Thursday, May 8, 2008

مصر زهقت منك خلاص



الكرسي عفن تحتك

إعلان مالوش علاقة بالموضوع خالص

مدونة قررت أكون عانس ... عادت للنشاط

بتصميم جديد وبوست جديد

Sunday, May 4, 2008

أحفاد العائلة

نبدأ بأكبرهم سنا

يوستفندي

يوسف ابن اختي رفيدة

اتولد : 31/5/2006






برقوقة


البراء ابن اسماء أختي
اتولد : 1/1/2008



جنة حفيدة خالي سعد
اتولدت : 14/2/2008

يوم عيد الحب