Saturday, May 17, 2008

تفاريح


بما أن دي مدونتي


يعني مسموح لي أكتب كل حاجة فيها ومحدش يقدر يعترض


فأنا هكتب شوية حاجات كده خنقاني من البشر اللي عالكرة الارضية


لو حد انا كنت بقدرها جدا وبحبها جدا في الاخر طلعت قليلة الذوق معايا ويعني عملت فيا حاجات مش كويسة


مش يحق لي أبقى شريرة واشربها من نفس الكاس


يعني ليه أول ما تيجي تعتذر أفتح صفحة جديدة وأقبل اعتذارها


ليه مش أعمل فيها نفس المواقف


عشان تحس نفس الاحساس بعدين أسامحها


ليه أبقى طيبة وأخلاقي كويسة


ليه مش أعاملها بالمثل


أذا عاقبتم فعاقبوا بمثل ما عوقبتم به


ليه المفروض أبتسم في وجه الناس اللي أنا مش طايقاهم


وأسلم عليهم واسمع الفشر بتاعهم


وازيك يا حبيبتي وعاملة ايه


يعني ايه المانع أكون قليلة الذوق


ومرضاش أسلم عليهم وأقولهم : يا منافقين لا حبيبتكم ولا بتاع كلكم شوية كدابين


ايه المانع يعني



هل أكون شريرة لو رحت انتقمت من شخصية أذتني من سنتين وضربتها بالقلم مثلا


علما بأني نفسي أصلا أعلقها من رجليها واحط تحت راسها نار ... لحد ما مخها الشرير يسيح


فلو ضربتها هيبقى أخف


الضرب مش حرام في حق الناس الوحشين


هكون قليلة الذوق لو البنت اللي بتستلمني كل شوية عالميل


آية أنا مكتئبة


آية أنا وحيدة


آية خطيبي زعلني


ماما شخطت فيا


آية بحبك ومش بتحبيني


أروح عامله لها بلوك وأقولها أني مش طايقاها ولا طايقة اكتئابها


ذنبي ايه أفضل اسمع في اكتئاب واحدة قابلتها مرة في حياتي


وكانت أكبر غلطة أني اديها ميلي


يعني ليه مش أريح مخي وأكون قليلة الذوق


أو أزعق لأي حد حاسس بالوحدة والغربة والكلام الكبير ده


وهو قاعد وسط أهله منعم مكرم


يعني أقولهم بصوا على أبناء المعتقلين والمغتربين


وأضربهم على غبائهم



أنا اتخنقت من النيك نيمات اللي عالماسنجر


هولع في أي حد يحط انه مكتئب ... او اختناق وانتحار وتمزق ومش عارف ايه


مش طالباهم يعني



ممكن نيك نيم مكتئب بس مش متشائم يجيب للخلق اللي حواليه اكتئاب


مش عايزة أكلم حد ويبعت لي ندج


عشان بكره الندجات جدا


زهقت من كمية النفاق والكدب اللي عند الخلق


قرفت من البنات اللي بتستخدم الشامبو بتاعي من غير اذن


وتاكل أكلي وتشرب عصيري


وبعدين تكدب وتقولي معرفش مين


عايزة اولع في الناس الظريفة


اللي أول ماتشوفني


تقولي ايه ده انتي رفيعه مش ناوية تتخني


لا جبتي التايهة .. عقلية ماشاء الله


لو عايزة أتخن كنت تخنت من زمان


نفسي أبقى أرد اقولها ايه ده مش ناوية تخسي


بجد منتهى الهبل والتدخل فيما لا يعنيها


بيحسسوني انهم فجأة اكتشفوا


مالها النحافة أفضل عشرين مرة من أني أعيش على ريجيم


بعرف اتحرك بسرعة عالاقل


اشمعنا لما نقول لحد انه رفيع يبقى عادي


ولما نقوله يا بدين تبقى قلة ذوق


مانسيب الناس في حالها


كل واحد حر في وزنه


سبحان الله


زهقت من الطيبة واني لازم أكون أحسن من الناس وأعاملهم كويس


لان بجد ناس كتير مش تستحق


كمية ناس الواحد انخدع فيهم وطلعوا وحشين


هيخلوني لو اكتشفت أن حد من اللي بشتغل معاهم او بتعامل معاهم حاليا


لو صدر عنه او عمل حاجة تدل انه وحش


مش هيكفيني قطع راسه بجد




اللي هيتصل بيا بعد البوست ده يقولي مالك


هتهور عليه بجد وهقفل السكة في وجهه


عشان أنا كويسة


بس اتخنقت من البشر


17 comments:

Anonymous said...

صدقييييييييني كلامك كله مظبوط ... واكتر حاجة بجد نفسي اعملها .. اني اقول للناس بطلوا نفاق .. ولما اشوف حد مش طايقاه ابصله من فوق لتحت وامشي .... ويااااااه بقى اللي يخنقك كمان انك تعيشي مع حد عامل فيها عم النضيف وهو حد فرفور ومالوش في اي بطيخ ... الله يعينا بجد
MoOoR

أحمد عبد الفتاح said...

يا عيني عالشر
:))
عندي معلومات موكده ان الي معلق قبلي من البنات الي بياخدو الشامبو وبيشربوا العصير
صح ولا انا غلطان ؟

Anonymous said...

يااااه
كل ده معبياه
دي عقد بقى
كلاعكيعو
لا احنا للاسف ما نقدرش نعيش بالحقيقة كاملة
لكن برضه مش لازم نخنق نفسنا على حس الذوق و المجاملات

كفايـة طيبـة said...

:D

آية

بحبك وانتى متعصبة

:D

وضـّاح said...

لن اقول لك انك اخطأت أو تجاوزت الحدود
ولكن أعجبتني التدوينة رغم ما بها من أشياء ربما اخالفك فيها .. كالعفو .. أو تحمل الناس .. إلى غير ذلك

أعجبتني التدوينة لأنها عبرت عن شعور إنساني, ووجهة نظر

أعانك الله
:)

معاذ فتحى .. فارس الأزهر said...

السلام عليكم ورحمة الله
حياكم الله أختنا الفاضله
الموضوع رائع ومتميز
لانه فضفضه نابعه من القلب
لكن لى تعليقات
وهى
أولا .. كما أن الله تعالى قال وإن عاقبتم فعاقبوا بمثل ما عوقبتم به ... فقال أيضا ولئن صبرتم لهو خير للصابرين .. وقال أيضا وأن تعفوا أقرب للتقوى
ثانيا .. نبينا محمد صلى الله عليه وسلم كان لا يزيده جهل الجاهل عليه إلا حلما.. وأضعف الإيمان .. إذا خاطبهم الجاهلون قالوا سلاما
ثالثا .. ما أجمل أن يلقاك غيرك بعين الكراهة ثم تلقاه أنت مبتسما .. وما أجمل أن يبغضنى قلبه وتخجله بسمتى ولا أحلى من أن يكون قاسيا فيجدنى أقرب الناس إليه فيخجل من عطائى الذى لا ينقطع
رابعا ً .. فى دعوتى تعلمت أن أكون سيدا ً .. والسيد ُ هذا كُتب عليه أن يلاقى كثيرا من الأصناف ويتعامل مع ألوان ٍ مختلفه فإن هو كان قاسيا كان مبغوضا وإن كان رحيما كان حبيبا .. رحيما حتى بمن يبغضه .. فبما رحمة ٍ من الله لنت لهم ولو كنت فظا غليظ القلب لانفضوا من حولك
خامسا ً .. إن لم تكن بسمتنا هى عنواننا فما هو العنوان .. وإن لم تكن قلوبنا ملجأ لكل حائر فمن يتعامل مع الجهلاء .. وإن لم نكن بقلب ٍ تعلم أن يحب الحبيب وينظر برحمة للبغيض فماذا نفعل ؟
سادسا ً وأخيرا .. أختنا الفاضلة . هذه ليست دعوة للطيبة التى تؤدى إلى فقدان الإحساس .. فنحن بشر نغضب حين نجد الغضب ونسعد حين نجد السعاده .. ولكنها دعوة لأن ننظر لكل من نعرفهم على أننا مسئولون عنهم وواجبنا إصلاحهم ..فإنما نحن فى الحياة فى طريق ٍ طويل نرجو أن يكون آخره الجنه .. ولهذا علينا أن نأخذ بأيدى بعضنا على هذا الطريق وليتحمل القوى منا الضعيف . وليتحمل العاقل الجاهل . وليتحمل البار العاق وهكذا .. لأننا مسئولون

أختنا الفاضله
حقا الموضوع رائع
أنا قرأته فى الصباح قبل ذهابى للإمتحان
وكنت حريصا على الرد مباشرة عند عودتى
لعل هذه هى وجهة نظرى
وكما قلت .. لأننا مسئولون عن هؤلاء
فلذلك .. ليه مش أعمل فيها نفس المواقف ؟ لان حضرتك مسئوله عنها وعن اصلاحها إن كان هناك وسيلة للاتصال بينكما

عذرا على الإطاله
وأكرمكم الله
وتقبلوا مرورى

أبو أسامة said...

السلام عليكم ورحمة الله وبركاته

طبعا أنا لن أتخدث عن التناسق الرهيب بين عنوان التدوينة :

تفاريح

وبين كمية الاكتئابات والتشنجات الموجودة داخل التدوينة .

" كان الله في العون "

ولكن عندي سؤال ملح جدا في ضوء الفقرة الأخيرة من مقالك :

مالك يا أخت آية ؟

noha said...

هههههههههههههههه

لو سألتنى يوم الاتنين .. او على الماسنجر او فى ردك

انتى بتضحكى على ايه
او ليه

هتهور ومش هرد عليكى
:) :)


جاااااااااااامد




هههههههههههه

mesh2dra said...

السلام عليكم

ياااه يا آيه
لو كنت سمعت الكلام ده من حد مكنتش صدقت
ولو كنت قريت البوست من غير متتكلمي نهاااردة مكنتش تخيلت ، ومكنش خيالي قدر يوصل لكل ما تعانيه

آيه
االلي يشوفها يقول بنوتة معندهاش مشاكل
او عندها مشاكل بس جدعة اووى اووى وقادرة تستحمل ومش مخلية المشاكل تأثر عليها


ليه مش أعمل فيها نفس المواقف

عشان احنا اتربينا على انه مينفعش
وخاصة ان نفس المواقف دى مينفعش نعملها ف حد ، صحيبح اتعملت فينا ، بس حسبي الله ونعم الوكيل

ليه المفروض أبتسم في وجه الناس اللي أنا مش طايقاهم

وأسلم عليهم واسمع الفشر بتاعهم
يعني ايه المانع أكون قليلة الذوق


ياريت ينفع
حاولت ، بس بتلاقي نفسك مش عارفة وضميرك مش مطاوعك ويا عينى ويا حرام
اللي اتربى واتعود على حاجة
- احمدي ربنا انك ماقعدتيش تعيطي عشان حد قل ذوقه معاكي :d


آيه
learn 2 say NOOOOOOOOO

حسبي الله ونعم الوكيل
وماتبصيش ورا
وماتبكيش على حد مايستاهلش
هما اللي خسروكي يا يويا

بوستك جه ع الجرح:s

سلاماتى :)

jessy88 said...

يه يا يويو انتى بقيتى شريرة كدة ليه لألألأ كل واحد يعمل باصله ويا بخت من بات مظلوم ولا بات ظالم تراجعى وخليكي طيبة وجميلة ع كل الناس ....

قررت أكون عانس said...

علما بأني نفسي أصلا أعلقها من رجليها واحط تحت راسها نار ... لحد ما مخها الشرير يسيح

وانا كمان نفسى لما تعملى كده ابقى قوليلىعشان اعملها معاكى وبلاش موضوع الضرب ده يا تنتون


صاحبك تنتن

Anonymous said...

السلام عليكم

تذكري قول الله تعالى

" والكاظمين الغيظ والعافين عن الناس "

وامضي قدما ولا تنظرى للصغائر من خلفك

لتنالي رضى الرحمن


تحياتي

محمد عبدالجليل said...

انا خايف اكتب تعليق تتهوري عليا واضح انك ممكن تبيعي اي حد مجرد ما تتخنقي منه

lulu said...

اه هم ما يستحقوش لكن الجنه تستحق انك تضحي عشانها
واسالي نفسك ايه اللي صبرك وما عملتيش اللي انتي بتقولي عليه ده

eman said...

سلام عليكم
على فكرة آية دى أول مرة أعلق لك على مدونتك الجميلة دى بس مش أول مرة أزور المدونة أنا متابعها من زمان بجد تدوينة رائعة ومدونة أكثر من رائعة وبجد الخنقة دى عند كل الناس بس الناس دول مش عارفين يقولوها بأى طريقةأو على الأقل عندى مش عارفة أقولها بأى طريقة.
تقبلى فائق احترامى وتقبلى مرورى
أختك فى الله /ايمان
eman419@maktoobblog.com
attar419@maktoobblog.com

حرة المداد. said...

سلام الله عليك وبحق اشتقت لك وتمنيت أن أراك عندما كنت في بيت ماما،ضحكت من القلب غصب عني والله لأني مش متعودة عليك وانت غضبانة ومخنوقة كده...عهدتك دائما مبتسمة ضاحكة...طبعا انت بشر ومن حقك تتخنقي .لو من شهر فات كنت هارد زي الأخ معاذ تمام ...بس دلوقت أنا كمان مخنوقة من النفاق والكذب وانك خير تعمل شر تلقى...مخنوقة ونفسي أبكي وأمضي لأبعد مسافة عن هؤلاء ومش طايقة حتى أشوف سحنتهم اللى مش بهية...جيت ع الجرح يا آية وحاسة بيك يا حبيبتي بس أرجع وأقول احنا رسالتنا أسمى والدعوة محتاجة تحمل للصعاب ونكون قدوة ونحلم على الناس بقدر جهلهم علينا وقد تعلمناها في الصغر وحفظناها عن ظهر غيب (...ادفع بالتي هي أحسن فاذا الذي بينك وبينه عداوة كأنه ولي حميم)صدق الله العظيم.بس الله يخليك بلاش قطع الراس والتعليق لحد ما المخ الشرير يسيح احنا ما اتفقناش على كده ! أشتاق لسهرة تضمنا جميعا حتى مطلع الفجر.

فلسطينية الهوى said...

شكرا

:D :D :D

على فكرة انا كويسة