Wednesday, June 11, 2008

وحشتني


عمري ما كتبت قبل كده عن علاقتي بخالي
مش فاكرة إني كتبت عنه خاطرة في يوم
دايما في عقلي بكتب عنه بس معملتهاش واقعيا أبدا
لاني يمكن مش متخيلة حتى اللحظة أنه مش معايا عشان أكتب عنه
أكتب إني مفتقداه
إني بجد حاسة بحزن رهيب وألم شديد أنه غايب عني
مش قادرة أعبر عنه لحد
مش متخيلة أن في حد ممكن يفهم شعوري ناحيته
او علاقتي بيه
بصبر نفسي وأقول أن في ناس أخدوا سبع سنين
وهو إن شاء الله هيخرج
بس الحقيقة ان الكلام ده مش نافع معايا بشيء
بقالي من العيد الكبير مشفتوش
كرهت القاهرة والكلية اللي كانت السبب اني مكنتش بشوفه كتير
آخر مرة شفته كانت في العيد وبعدين انشغلت بالامتحان
وسافرت السعودية ورجعت يوم الجمعة 22/2
وأول حاجة عملتها اتصلت بيه
ازيك ياخالو
قالي وحشتيني هشوفك امتى
قلت له الخميس أكيد
الخميس عرفت أنه اعتقل
ومن يومها معرفتش أشوفه ... كل المحاولات باءت بالفشل
حتى الزيارة باءت بالفشل
شعور لا يمكن وصفه حاسه بيه
حاسة اني غبية اني مرحتش شفته اول ما وصلت من السعودية
حاسة اني جبانة لاني حتى وأنا بتمنى أزوره ببقى خايفه اوي أشوفه في السجن
أكيد هنهار
مش متخيلة شعوره أن والدته توفت وهو مش جمبها
هقوله ايه لو شفته
وحشتني ؟؟ ولا البقاء لله ؟ ولا ربنا يعينك ويصبرك ؟؟
خالو
يعني ايه خالو سعد بالنسبة لي ؟؟
أبي الروحي .. وصديقي .. وشقيق أبي
بحبه لأنه أخو ماما ... من حبي لماما بحبه
بحبه لأنه صديق بابا المقرب ... من حبي لبابا بحبه
وبحبه لأنه خالو سعد
خالو العظيم في كل شيء ... حتى في الابتلاء
نفسي يخرج بقى
واترمي في حضنه وأقوله وحشتني
فخورة بأنك خالي
______________________




الشكر الموصول لعياش عالتصميم
ربنا يكرمك

3 comments:

أحمد عبد الفتاح said...

يا بخت من كان الراجل ده خاله
فك الله اسره يارب

mesh2dra said...

ربنا يرجعه بالسلامة
ان شاء الله
ويصبره

Anonymous said...

وهوا برضك خالي
الذي لم القاه يوما..


آآآآآه
المنسيه