Monday, December 22, 2008



منة وبسمة

بسمة ومنة

اتنين من أجمل الناس اللي قابلتهم في حياتي

معايا في القسم ومعايا في مشروع التخرج

وكل يوم بتعامل معاهم فيه

بكتشف اد ايه قلوبهم نقية جدا وصافية جدا

نبع عطاء متدفق

مقابلتش حد عنده القدرة والرغبة في العطاء اللامتناهي زيهم

عطاء معنوي ومادي لا محدود

اخلاص ووفاء لمبادئهم وأفكارهم وأصدقائهم

أحيانا كده بينعزلوا عننا

وكأنهم في جزيرتهم الخاصة

اللي بيتبادلوا فيها لغة محدش غيرهم بيفهمها

صداقتهم وصلتهم ببعض جميلة جدا

بحب أتفرج عليهم سوا

بحس كأنهم عصفورين قاعدين يزقزقوا

ضحكتهم جميلة جدا

تعاملهم راقي أوي

أحيانا بحس من الغيرة من تقاربهم ده

وأننا بره دايرة العالم بتاعهم

بس بغبطهم على الاخوة الحقيقية اللي ما بينهم

انا يوم ما عرفتهم

عرفتهم ثلاثي

ياسمين ومنة وبسمة

حاليا بقوا ثنائي وواحدة

بحس بفخر شديد

اني معاهم في نفس القسم

واني هتخرج مع ناس زيهم

اني خرجت من الكلية بصحبتهم

ال4 سنين في الكلية لو مكنش فيها أي حاجة كويسة غيرهم

دي تكفيني

مش عارفة أشكر ربنا ازاي على اني اتشرفت بمعرفتهم وصداقتهم

ويامنة وبسمة

ابقوا دخلوني أنا وياسمين الدايرة والا

ربنا يجمعنا سوا في الجنة يارب


8 comments:

jessy88 said...

لا ياختى اللى انتى متعرفيهوش انى ليا دايرة منفصلة مع كل واحدة فيكم يعنى ليا دايرة قريبة اوى من ايه ودايرة قريبة اوى اوى من بسمة ودايرة قريبة برضه من منة بس مش عارفة لما بنجتمع كلنا فى دايرة واحدة ببقي فرحانة

أمانى وياسمين said...

معاكي حق يا اية بجد بسمة ومنة من اجمل نماذج الصداقة اللي شوفتها في حياتي

ربنا يخليهم لبعض دايما ويحميهم :)

بعتز جدا بصداقتهم ومعرفتهم

الصورة حلوة اوي على فكرة ;)

كفايـة طيبـة said...

وبعدين بقي مع الكلام ده

:D

انتوا مصرّين تزعلونا ليه اننا برة البلد

:D

لالا

بس خلاص بسمة مبقتش توحشنى :P

منة بس اللى وحشانى

بسمة بقت شوريرة خلاص .... ربنا يكون فى عون منة

:D

اى خدمة ... بوظت البوست يا اية :D

HERO said...

والله فعلا الصداقة دي احسن حاجة في الدنيا وهي اللي بتنفع الواحد في دنيته بس تكون على حق طبعا واكيد طالما هما عجبوكي يبقى اكيد انتي كمان زيهم واكيد هما كمان فرحانين ان انتي تبقي معاهم

تحياتي

اسلام ابوغزاله..... ليه بس ؟ said...

في جنة الخلد التلاقي

اسلام ابوغزاله..... ليه بس ؟ said...

قال الله في حديث قدسي { المتحابون بجلالي لهم منابر من نور يغبطهم النبيون والشهداء }

Anonymous said...

فعلا يا ايه اصابتى
منة و بسمة من الناس الكويسين جدا من ساعة ما عرفتهم و انا بقول كدة والله
بس تعرفى احنا كلنا اصحاب اه بس خلال السنتين تلاتة اللى انا صاحبتهم فيها لحد دلوقتى ماندمجتش معاهم للدرجة
فعلا مع اننا نبان اصحاب اوى فالدفعة الا ان اللى يقرب يلاقى منة و بسمة ليهم دايرة انا عن نفسى حتى ماينفعش ادخل فيها ، مش لانهم مش هايرضوا لكن لانى حاسة انهم ماينفعش يكونوا انتيم هما ممكن يبقوا اصحاب كويسين اوى لكن الانتيم دة لازم يبقى زيك اوى او علا الاقل انسان بيزعل ساعات و يزعلك ساعات تانية و دة مش فيهم نهائى يعنى اى علاقة انسانية لازم يكون فيها شد و جذب و هما مش كدة بصراحة ماقدرتش
يمكن اللى فيه كتير منى ياسمين هاشم اكتر و هى عارفة كدة
بس هما الاتنين احسن انتيم لبعض
ربنا يديم صداقتنا يارب

mesh2dra said...

السلام عليكم

انا مش عارفة ارد بإيه يا آيه

على أد ما فرحت اوى بالإثناء علينا على أد ما خفت اوى اننا ف يوم من الأيام منكونش عند حسن ظنكم فينا

بوستك فرحني اوى يا آيه
بجد سعيدة جداااااااااااا
ربنا يكرمك يارب
ونبقى مع بعض ف الجنة آمين

عارفة يا آيه
انا بقى اللي مش عارفة اشكر ربنا ازاى انه عرفني بمنه
واشكر منه لانها عرفتني بياسمين هاشم"جيسي" "مامتنا الكبيرة واختنا القريبة وصاحبتي اوي اوي"

واشكر ياسمين وكفاية طيبة لانهم عرفوني بآيه الفقي
البنت بجد اللي لو فضلت اكتب عنها ف مدونات الدنيا كلها مش حقدر اوصف اخلاقها ولا ادبها ولا نقائها ولا ضحكتها ولا دمها الخفيف اصلا

آيه
بجد انتي من الناس اللي لما بتيجي ف مكان بتلاقي نور وتفاءل وبتعملي روح جديدة ف الجو

انتي جوا دايرتنا اصلا
ولو محستيش بده تبقى غلطتنا
ربنا يكرمك يارب:)

انا حرد على الناس - بعد إذنك

جيسي:
أنا كمان فخورة اوى بدايرتنا
و بحب اوى الدواير اللي بينك وبين الناس وبحب كمان اوي الدايرة اللي بيني وبينك

أماني وياسمين
"البلابل الوديعة":
ربنا يكرمكم يارب
ويديم صداقتكم انتم كمان يارب


منى "مومو":
:D
كده يا كفاية طيبة تشردي لصاحبتك
طب آيه شايفة الجانب الطيب لانها طيبة
انتي بقى شايفة الجانب الشرير ليه ..عشان انتي ...:P

بسمة بقت شوريرة خلاص
أنا شريرة من زمان ، بس آيه مش واخدة بالها، وانتي لسه مكتشفة الموضوع ده قريب:P


hero:
واكيد طالما هما عجبوكي يبقى اكيد انتي كمان زيهم واكيد هما كمان فرحانين ان انتي تبقي معاهم

اصبت بجد
ربنا يكرمك .. عبرت فعلا

إسلام ابو غزالة:
يارب
اللهم آمين :)

Anonymous :
أنا مش عارفة مين
:Dومش عارفة استنتج
بس يارب آمين
يديم صداقتنا مع كل اصحابنا


آيه
انتي فتحتي نفسي للتدوين من تاني
خلاص ... قرار رقم 987654321
أنا قررت ارجع للتدوين من تاني ، واول بوست حكتبه ان شاء الله عن دايرتنا الكبيرة ... لما نخلص السنة دي على خير :d

تقبلي تحياتي وسلاماتي وقبلاتي وبالحضن بقى:)