Friday, May 8, 2009

تخاريف


باقي شهر بالزبط وأكون في عداد الخريجين

إن شاء الله

مش عارفة ليه عندي زحمة أفكار ومشاعر كتير جوايا

اتعلمت حاجات كتير جدا خلال الأربع سنين اللي تغربت فيهم هنا في القاهرة

4 سنين طوال جدا

عشتهم من غير أهلي

تعلمت يعني ايه الوحدة .. ازاي تمر عالانسان أيام ميتكلمش لانه مش لاقي حد معاه يكلمه

لحد ماينسى صوته

اتعلمت ازاي أتعايش مع الوحدة والغربة وأنتصر عليهم بدل ما يغلبوني

اتعلمت كتير جدا عن البشر والعلاقات الإنسانية

أهم درس اتعلمته

الضغط يولد الانفجار

مفيش حب ولا قرب بيجي بالاكراه

لما ندفع شخص بإصرار تجاه شخص تاني .. لازم فالاخر هيزهق من قوة الدفع

قانون فيزيائي بسيط

لكل فعل رد فعل مساوي له في القوة معاكس له في الاتجاه

الضغط في ناحية = هروب في الناحية التانية

أحيانا كتير بنبعد ونحتفظ بشعرة معاوية يمكن لما نخف نرجع تاني

بس الضغط بيقطع الشعرة وبيبقى الطريق ذهاب بلا عودة

اكتشفت عن نفسي حاجات كتير

أهمها : إني فاشلة في العلاقات الإنسانية

مبعرفش أجمع ما بينها ومابين حياتي

لما بخاف أو بنجرح أو بتعب

بهرب

ببعد

ولما أرجع كويسة برجع تاني

ناس حواليا كتير استغربوا إني في وقت المصاعب اللي بمر بيها

ببعد عن كل ماهو بشري

بقطع تواصلي مع عالم البشر

شايفين ان ده غلط كبير جدا مني

لما حللت الموقف .. عرفت ليه أنا بهرب

لاني ببساطة فقدت إيماني بالبشر

كل تجاربي السابقة في حياتي علمتني حاجة واحدة

إن القرب من البشر يعني الألم والمزيد من الألم

الشخص اللي هحتاجه بجد في الموقف اللي بتحط فيه مش هلاقيها ولا بلاقيه

اكيد كان في استثناءات

بس ده الاستثناء اللي بيثبت القاعدة

مش عارفة ليه على الرغم من كوني رغاية وعندي قدرة كتابة عالية الحمد لله

مبعرفش أتكلم

مبعرفش يوم ما أزعل أو أتعب أقول

زعلت وتعبت

مبعرفش أعيط قدام حد

لحد ما الكل أخد فكرة إنها الجبل اللي مبيتكسرش
فنزلوا عليا بالضربات أصلي مش هتكسر

الغريب إني اتكسرت

اتكسرت وبشدة كمان

قلبي اتشرخ شرخ صعب أصلحه

مفاهيم كتير كفرت بيها

حاجات كتير اتخليت عنها

لان الجبل لما بيقع

بيتهد وبينهار .. وفي انهياره بياخد كل حاجة في طريقه

آمنت مؤخرا إن فعلا أنا من ناقصات العقل زي ما وصفنا الرسول

مهما كان تفكيري منطقي وعقلاني وصائب
تحت شلال الألم

ده كله راح

ومظهرش غير فيضان عواطف يحمل في موجاته كل التناقضات

أنا شخصيا فوجئت بتدفق العواطف اللا متناهي ده

صدمت إني بحمل كمية المشاعر دي جوايا وكنت كاتماها
مكنتش متخيلة وجودها بالصورة دي

ورغم ده أنا مزعلتش

مزعلتش اني بقيت إنسانة غير عقلانية بالمرة

بقيت عاطفية بالدرجة الأولى

مزعلتش لاني حسيت أخيرا إني إنسانة

إنسانة بضعفي وألمي وبفيضان مشاعري

إنسانة جيه عليها وقت وتعبت

فقدت قدرتها على العطاء

كل اللي احتاجته ... كتف تبكي عليه

حد يقولها : بكرة أحلى

كل حاجة هتبقى كويسة

احنا واقفين جمبك ومعاكي مهما كان

أيا كان اللي عملتيه .. احنا جمبك لاننا عارفين الانسانة اللي جواكي شكلها ايه

لاول مرة في حياتي

أشتاق لكلمة تقدير واحدة

الضغط اللي كنت فيه .. خلاني عايزة حد يطمني ويقولي انتي كويسة

حتى لما ملقتش الكلمة دي

كملت حياتي عادي

لان حياتي علمتني

ليس كل ما يتمناه المرء يدركه .. تأتي الرياح بما لاتشتهي السفن

___________________________


انا مش فاهمة حاجة من اللي كتبته

بس كنت محتاجة أفضفض

أطلع زحمة الكلام بره

ادعولي

5 comments:

Anonymous said...

السلام عليكم


أنتي الان تتمثلي بقول الله سبحانه وتعالى
" والكاظمين الغيظ "

جزيتي خيرا

وامضي في طريقك


ولا تلتفتي الي الخلف

اطلاقا

اتركيهم وحدهم

وامضي في طريقك

الى الامام

واثبتي على المبادئ

فإنها من شيم الابطال الاقوياء

بالرغم مما يمرون به من عقبات وظروف قاسية

تحياتي
أبو مالك

Abdelrahman said...
This comment has been removed by the author.
كفايـة طيبـة said...

ربنا يخفف عليكي ياحبيبي :)

والله فترة وهتعدي وكل اللى جاى هيبقي احسن
صدقيني
بكرة تقولى مومو قالت
:)

mesh2dra said...

السلاام عليكم

كله بيعدي يا ايه
وفعلا ليس كل ما يتمناه المرء يدركه
وما قدر ان يكون سيكون

بس سيبك من كل اللي حصل

المهم انك اتعلمتى حاجات مكنتيش حتتعلميها الا بالتجربة
مهما اخدتى في نصايح وتجارب ناس إلا انك مكنتيش حتحسي بالاستفادة الا بعد التجربة
حتى لو كانت التجربة دى بتألم
بس كله في سبيل التعلم

انتى قوية يا ايه
وقوية اوى كمان
وقادرة تستحملي وإلا مكنش ربنا حطك في المواقف دي كلها
وربنا ما بيحطش الانسان في موقف فوق احتماله .. مش ده كلامك


بس القوة لا تتعارض مع اننا احيانا بنحتاج ناخد هدنة من كتر الحاجات اللي فوق دماغنا
وانتى في الهدنة دى دلوقتى
وحترجعي زى ما كنتي و... اقوى .. ان شاء الله

الله يعينك ويقويكي

فليعد للدين مجده said...

أولا مبروك قربك من التخرج وممارستك الحياة العملية والانتقال لطور جديد

ثانيا: ما ذكرتيه عن نفسك هو شئ طبيعي وهو من جملة الضعف البشري المكتوب علينا وفقدان الثقة بالناس في بعض الاحايين

ربنا يرزقك الصحبة الصالحة المخلصة التي تستشعري بينها بالامان
تمنياتي بالتوفيق